Tinna Grétarsdóttir, doktor í sjónrænni mannfræði við Félags- og mannvísindadeild
Hvað er rusl? Hvernig birtist ruslmenning á söfnum? Hvaða menningarlega virði hefur rusl? Þetta er meðal spurninga sem Tinna Grétarsdóttir, doktor í sjónrænni mannfræði, og Sigurjón Baldur Hafsteinsson, lektor í safnafræði, leitast við að svara í nýju tíu eininga námskeiði. Það er kennt á ensku og heitir „Trash Culture at the Museum.“
Eitt af verkefnum námskeiðsins er að fá nemendur til að skoða sín eigin söfn. „Öll erum við safnarar og það kemur berlega í ljós þegar nemendur líta í eigin barm. Fólk safnar alls konar hlutum, t.d. tölvupósti, ráðstefnutöskum, bókum, rafmagnstækjum, snúrum og öðru slíku,“ segir Tinna.
Tinna Grétarsdóttir
„Öll erum við safnarar og það kemur berlega í ljós þegar nemendur líta í eigin barm. Fólk safnar alls konar hlutum, t.d. tölvupósti, ráðstefnutöskum, bókum, rafmagnstækjum, snúrum og öðru slíku.“
Námskeiðið „Trash Culture at the Museum“ gengur út á að rýna í íslenskt samfélag með gleraugum svokallaðrar ruslmenningar. „Mótmælin við Austurvöll gáfu okkur tilefni til að rýna í samtímann. Á sjónvarpsmyndum sást fólk kasta rusli í Alþingishúsið. Talað var um ruslaralýð í því samhengi og á sama tíma var Ísland mælt í ruslflokki efnahagslífsins. Svo er staðreynd að sorp hefur dregist saman um 40% frá hruninu haustið 2008, og það segir okkur ýmislegt um menningu þjóðarinnar,“ segir Tinna.
Námskeiðið er þverfaglegt samstarfsverkefni og er tengt við ýmis fyrirtæki og stofnanir, t.d. mennta- og menningarmálaráðuneytið, Endurvinnsluna, Sorpu og Gámaþjónustuna hf. „Þverfagleg og praktísk nálgun gerir það að verkum að námið nýtist fólki af ólíkum sviðum. Nemendur eru ekki eingöngu úr ólíkum greinum heldur einnig af ýmsu þjóðerni,“ segir Tinna.
Námskeiðið „Trash Culture at the Museum“ er næst á dagskrá á haustmisseri 2011.