Guðrún Geirsdóttir, dósent við Kennaradeild
„Upphaflega hafði ég sérstakan áhuga á að kanna viðhorf fyrsta árs nema til háskólanáms því að ég veit að mörgum nemendum reynist erfitt að fóta sig til að byrja með í háskólum,“ segir Guðrún Geirsdóttir, dósent við Kennaradeild, um rannsóknarverkefni sitt sem nefnist einfaldlega „Að hefja nám við Háskóla Íslands.“
„Vorið 2008 lauk ég rannsókn á námskrá Háskóla Íslands þar sem ég skoðaði m.a. hvernig háskólakennarar í þremur háskólagreinum taka
ákvarðanir um nám og kennslu nemenda sinna. Við þá gagnaöflun var ég oft spurð að því hvers vegna ég talaði ekki við nemendur líka. Ég ákvað að það yrði næsta rannsóknarefni,“ útskýrir Guðrún.
Guðrún Geirsdóttir
„Upphaflega hafði ég sérstakan áhuga á að kanna viðhorf fyrsta árs nema til háskólanáms því að ég veit að mörgum nemendum reynist erfitt að fóta sig til að byrja með í háskólum.“
Hún bendir á að erlendar rannsóknir sýni að háskólar geti gert margt til að styðja nýnema. „Í rannsókninni fylgist ég með því hvernig tólf nemendur í þremur háskólagreinum takast á við nám sitt, hvernig þeir völdu sína grein, viðhorf þeirra til hennar, hvaða leiðir þeir fara í námi, hvað þeir telja að styðji þá og hindri. Ég hóf rannsóknina með viðtölum við nemendur haustið 2009 og hef tekið viðtöl við þá reglulega síðan. Nemendurnir eru nú á þriðja ári í háskólanum og ég ætla að fylgja þeim eftir fram yfir útskrift úr grunnnámi,“ segir Guðrún.
Hún segist vona að rannsóknin hafi margþætt gildi. „Hún veitir skilning á sjónarmiðum nemenda til náms og kennslu en sú þekking er mér sem háskólakennara og kennslufræðingi og vonandi háskólasamfélaginu öllu dýrmæt. Á alþjóðavísu gætu niðurstöðurnar veitt áhugaverðan samanburð á námsaðstæðum nemenda í ólíkum löndum og langtímasnið hennar dregið fram sjónarhorn sem ekki eru alþekkt í fyrri rannsóknum. Þá er samanburður nemendasjónarmiða við niðurstöður rannsókna minna á viðhorfum kennara nýlunda,“ segir Guðrún að lokum.