Hólmfríður Garðarsdóttir, prófessor við Deild erlendra tungumála, bókmennta og málvísinda
Dvöl Hólmfríðar Garðarsdóttur, prófessors í spænsku, á Kyrrahafsströnd Kostaríku fyrir margt löngu er kveikja að rannsókn hennar á sjálfsmynd og bókmenntum Mið-Ameríkuríkja. „Rannsóknarspurningarnar hafa mallað í undirmeðvitundinni allar götur frá því að ég dvaldist þar. Ég undraðist hvernig íbúunum tækist að lifa saman í sátt og samlyndi þrátt fyrir, að því er virtist, óendanlegan fjölbreytileika kynþátta, menningar og tungumála,“ segir Hólmfríður.
Rannsókn Hólmfríðar er tvíþætt. „Annars vegar snýr hún að greiningu á fyrirliggjandi kenningum um mótun sjálfsmyndar. Spurt er hvort og þá hvernig hún fellur að fjölmenningarsamfélögum Karíbahafsstrandar Mið-Ameríkuríkja. Hins vegar snýr hún að greiningu á bókmenntaverkum frá strandhéruðum Hondúras, Níkaragva, Kostaríku og Panama. Ég velti fyrir mér hvernig þau endurspegla samfélögin sem þau eru sprottin úr og hvaða myndir eru þar dregnar upp af minnihlutahópum strandhéraðanna,“ segir Hólmfríður, sem leggur sérstaka áherslu á verk og birtingarmyndir kvenna.
Hólmfríður Garðarsdóttir
Dvöl Hólmfríðar á Kyrrahafsströnd Kostaríku fyrir margt löngu er kveikja að rannsókn hennar á sjálfsmynd og bókmenntum Mið-Ameríkuríkja.
„Fyrstu niðurstöður staðfesta að í verkum rithöfunda og skálda frá Karíbahafsströnd Mið-Ameríkuríkja er myndun sjálfsmyndar algengt umræðuefni. Það á ekki hvað síst við um rithöfunda af blönduðum uppruna eða þá sem yfirgefið hafa heimaslóðirnar og sest að í höfuðborgum landanna sem um ræðir. Menningaraðlögunin sem það krefst vekur áleitnar spurningar sem rithöfundarnir taka til umfjöllunar í skáldverkum sínum,“ segir Hólmfríður.
Rannsóknin hefur margþætt gildi og tengir á nýstárlegan hátt fræðaheim hug- og félagsvísinda. „Í rannsókninni er sjónum beint að blómstrandi menningarlífi jaðarsamfélaga og að samfélagshópum sem gjarnan eru beittir þöggun. Hún bregður um leið ljósi á menningarlega fjölbreytni landanna í Mið-Ameríku og þegar haft er í huga að bókmenntir eru mikilvægur skrásetningarmiðill sögunnar er augljóst að þær auka þekkingu og skilning á jaðarsamfélögunum í Mið-Ameríkuríkjunum,“ segir Hólmfríður.