Blóðsykurslækkun hjá nýburum

Elín Ögmundsdóttir, MS frá Hjúkrunarfræðideild

„Rannsóknin fjallar um hversu algeng blóðsykurslækkun er hjá nýburum, hvaða áhættuþættir búa að baki henni og hvernig staðið er að eftirliti með blóðsykri hjá nýburum á Landspítala,“ segir Elín Ögmundsdóttir, sem lauk meistaraprófi í hjúkrun vorið 2012. Hún starfar á vökudeild, nýburagjörgæslu spítalans, þar sem hugmyndin að rannsókninni kviknaði. „Þar er eftirlit með blóðsykri nýbura algeng hjúkrunarmeðferð, sem gjarnan leiðir til íhlutana á borð við þurrmjólkurgjöf, sem getur truflað upphaf brjóstagjafar. Vísbendingar voru um að sú ákvörðun að mæla blóðsykur væri fremur byggð á venjum en gagnreyndri þekkingu.“

Elín Ögmundsdóttir

Úrtak Elínar voru 955 nýburar. „Tíðni blóðsykurslækkunar var 21,2% sem er mikið í samanburði við erlendar rannsóknir. Það skýrist að hluta til af samsetningu úrtaksins þar sem ekki var aðeins um heilbrigða, fullburða nýbura að ræða,“ segir hún og heldur áfram: „Eftirlit með blóðsykri reyndist ómarkvisst, stór hluti mælinganna var gerður innan klukkustundar frá fæðingu og því má ætla að erfitt hafi verið að greina á milli óeðlilegrar blóðsykurslækkunar og eðlilegrar aðlögunar nýbura að lífi utan móðurkviðar.“

Rannsókn Elínar á tíðni blóðsykurslækkunar hjá íslenskum nýburum er sú fyrsta sinnar tegundar og er vísindalegur ávinningur fólginn í því að fá íslenskar tölur til samanburðar við erlendar rannsóknir. „Niðurstöðurnar leiða einnig til þess að hægt er að bera núverandi starfshætti saman við starfshætti byggða á gagnreyndri þekkingu um blóðsykursstjórnun hjá nýburum og greina hvar úrbóta er þörf. Niðurstöðurnar geta því orðið til þess að bæta þjónustu við nýbura og foreldra þeirra.“

Leiðbeinendur: Guðrún Kristjánsdóttir, prófessor við Hjúkrunarfræðideild, og Þórður Þórkelsson, yfirlæknir vökudeildar Barnaspítala Hringsins.