Hanna Ragnarsdóttir, dósent við Uppeldis- og menntunarfræðideild
„Undantekningarlaust fá ættleidd börn mikinn stuðning á heimilum sínum og þeim gengur yfirleitt vel í skóla,“ segir Hanna Ragnarsdóttir, dósent í fjölmenningarfræðum, sem stendur ásamt Elsu Sigríði Jónsdóttur fyrir rannsókn á ættleiddum börnum á Íslandi, reynslu þeirra af aðlögun og skólagöngu.
Hanna Ragnarsdóttir
„Undantekningarlaust fá ættleidd börn mikinn stuðning á heimilum sínum og þeim gengur yfirleitt vel í skóla“
Rannsóknin hófst árið 2005 og stendur enn. Byrjað var á því að skoða reynslu fjölskyldnanna af því að ættleiða börnin. „Börnin voru ættleidd til Íslands árið 2002 og árið 2004, tíu börn í hvorum hópi, og voru þau öll um eins árs gömul við komuna,“ segir Hanna. Núna sé verið að tala við börnin sjálf og athuga reynslu þeirra af skólagöngu, alveg frá leikskóla en nú eru þau öll komin í grunnskóla. Markmiðið er því að skoða hvernig þeim vegnar í námi, félagslega stöðu þeirra og hvort eitthvað reynir sérstaklega á þau. Einnig er skoðuð sjálfsmynd þeirra og hvernig þau líta á sig sjálf í íslensku samfélagi.
Hanna hefur rannsakað aðlögun innflytjenda á Íslandi síðustu 15 ár. Lengi hafði hana langað til að skoða hvort reynsla ættleiddra barna væri svipuð reynslu innflytjendabarna og fjölskyldna þeirra. „Árið 2004 fór ég á málþing hjá Íslenskri ættleiðingu til þess að kynna mér málin og í kjölfarið fórum við af stað með þessa rannsókn og það varð kveikjan,“ segir hún.
Hanna segir að fjölskyldur ættleiddra barna séu sterkar. Atvik sem snerta litarhátt og uppruna hafi komið upp í skólunum en tekið hafi verið á þeim. Börnin séu jafnframt mjög opin gagnvart uppruna sínum. „Það verður áhugavert að fylgja ættleiddu börnunum eftir áfram og góður stuðningur er frá foreldrum barnanna við að halda rannsókninni áfram,“ segir Hanna.