Ungmenni af erlendum uppruna njóta síður jákvæðra tengsla við félaga og vini en innfædd ungmenni og eiga erfitt með að eignast innlenda vini, jafnvel þegar þau hafa náð tökum á nýja tungumálinu. Jafnframt er viðurkennt að vinir geta gegnt lykilhlutverki í lífi þessa hóps þegar foreldrar hafa litla möguleika á að styðja börnin við flutning milli landa,“ segir Eyrún María Rúnarsdóttir, stundakennari í uppeldis- og menntunarfræði. Hún leggur stund á doktorsnám við Leiden-háskóla í Hollandi en safnar gögnum í rannsókn sína alfarið hérlendis.
Eyrún María Rúnarsdóttir
Ungmenni af erlendum uppruna njóta síður jákvæðra tengsla við félaga og vini en innfædd ungmenni og eiga erfitt með að eignast innlenda vini, jafnvel þegar þau hafa náð tökum á nýja tungumálinu.
Eyrún María rannsakar félagasamskipti og einelti meðal barna og unglinga af erlendum uppruna hér á landi. „Niðurstöðunum er ætlað að bæta úr skorti á fræðilegri þekkingu og skilningi á efninu ásamt því að benda á hvernig bæta má skilyrði ungmenna af erlendum uppruna til að tengjast nýjum félögum,“ segir Eyrún María.
Eyrún María hlaut styrk úr Styrktarsjóði Margaretar og Bents Scheving Thorsteinssonar til að vinna þann hluta rannsóknarinnar sem felst í að dýpka skilning á vina- og félagasamskiptum sem innflytjendabörn eru þátttakendur í og útskýra hvað verður til þess að þau eru frekar fórnarlömb eineltis en íslenskir félagar þeirra.
Í fyrsta hluta verkefnisins eru greind fyrir- liggjandi gögn úr landskönnuninni Heilsa og lífskjör skólanema, sem lögð var fyrir nemendur í 6., 8. og 10. bekk skólaárið 2009–2010. „Lífsánægja og vanlíðan barna af pólskum, asískum og vestur-evrópskum uppruna var borin saman við ánægju og líðan íslenskra barna og helstu niðurstöður eru þær að allir hópar barna af erlendum uppruna upplifðu síður lífsánægju en íslensk börn, og asískum og vestur-evrópskum leið verst,“ segir Eyrún María.
Að sögn Eyrúnar Maríu hefur komið fram að börnum af asískum uppruna farnast síst í samfélaginu og þau upplifa einnig minni stuðning frá foreldrum og vinum og neikvæðari bekkjaranda en íslensk börn. „Þá var meira um einelti í hópi barna af erlendum uppruna en hjá íslenskum börnum. Þau sögðust í meira mæli vera þolendur þess en íslenskir félagar þeirra og eru jafnframt líklegri til þess að vera bæði gerendur og þolendur eineltis,“ segir Eyrún María sem telur niðurstöðurnar frekar sláandi. Hún hyggst safna frekari gögnum til að öðlast betri skilning á félagatengslum innflytjendabarna.
Leiðbeinendur: Paul Vedder, prófessor við félagsvísindadeild Leiden-háskóla, Mitch van Geel, lektor við félagsvísindadeild Leiden-háskóla, og Rúnar Vilhjálmsson, prófessor við Hjúkrunarfræðideild.