„Stúlkur eru mun líklegri en drengir til þess að beita markvissum námsaðferðum sem stuðla að lesskilningi,“ segir Freyja Birgisdóttir, dósent í sálfræði við Kennaradeild, en hún rannsakar læsi og kynjamun á sjálfstjórn unglinga í námi.
Freyja Birgisdóttir
„Stúlkur eru mun líklegri en drengir til þess að beita markvissum námsaðferðum sem stuðla að lesskilningi.“
„Mér leikur forvitni á að vita hvort þessi munur geti skýrt misgott námsgengi drengja og stúlkna, sérstaklega í lestri,“ útskýrir Freyja. Rannsóknin er partur af stærra verkefni sem unnið er í samvinnu við Steinunni Gestsdóttur, dósent við Sálfræðideild, og Kristján Ketil Stefánsson, doktorsnema við Menntavísindasvið, þar sem þróun sjálfstjórnar hjá unglingum og tengsl hennar við gengi í skóla eru skoðuð. „Aukinn skilningur á þeim þáttum sem gætu haft áhrif á læsi unglinga og kynjamun nýtist kennurum og öðrum sem koma að menntun þeirra,“ útskýrir Freyja.
Að sögn Freyju sýna PISA-kannanir síðastliðinn áratug viðvarandi kynjamun á lesskilningi nemenda í 10. bekk. „Árið 2009 kom fram að sjötíu prósent þeirra íslensku nemenda sem teljast slakir í lestri voru drengir. Stúlkur eru mun líklegri en drengir til þess að beita markvissum námsaðferðum sem ýta undir lesskilning en slíkar aðferðir bera vott um góða sjálfstjórn í námi. Því er áhugavert að skoða hvort færni drengja og stúlkna á því sviði gæti hugsanlega skýrt misgóða framvindu þeirra í lestri og námi almennt,“ segir Freyja.
„Lestrarfærni er undirstaða góðs náms- árangurs. Þess vegna er mjög mikilvægt að öðlast skilning á þeim þáttum sem hafa áhrif á færni unglinga á þessu sviði. Læsi unglinga og samspil þess við önnur svið þroska, eins og til dæmis sjálfstjórn, hefur til þessa lítið verið rannsakað. Niðurstöður úr rannsókninni liggja ekki fyrir enn en meginspurningin er hvort fram kemur kynjamunur á sjálfstjórn nemenda í námi og hvaða hlutverki sá munur gegnir þá í námsgengi þeirra.“