Nína Þrastardóttir, MS frá Hagfræðideild
„Lokaverkefnið mitt snerist um að skoða hvort tengsl eru milli tekna og líkamsþyngdar á Íslandi einu ári fyrir efnahagshrunið árið 2008 og einu ári eftir það,“ segir Nína Þrastardóttir, sem lauk meistaraprófi í fjármálahagfræði vorið 2013.
Aðspurð um kveikjuna að verkefninu segist Nína alltaf hafa haft mikinn áhuga á heilsu og bendir á að mikil heilsuvakning hafi átt sér stað í heiminum á síðustu árum. „Við búum í mjög hröðum heimi sem gerir það að verkum að lítill tími gefst til matseldar og því fer skyndibitamenningin vaxandi.“ En er algengara að þeir tekjulægri séu þyngri en þeir tekjuhærri? spurði Nína sig við upphaf vinnunnar við lokaverkefnið.
Nína Þrastardóttir
„Lokaverkefnið mitt snerist um að skoða hvort tengsl eru milli tekna og líkamsþyngdar á Íslandi einu ári fyrir efnahagshrunið árið 2008 og einu ári eftir það.“
„Ég sá að það höfðu verið gerðar rannsóknir á þessu víða í Bandaríkjunum og Evrópu en ekki hér á landi. Í næstum öllum erlendum rannsóknum sem ég skoðaði kom fram að því lægri sem tekjurnar voru hjá fólki því hærri var líkamsþyngdarstuðullinn og öfugt. Því fannst mér spennandi að skoða þetta með Íslendinga í huga,“ útskýrir hún.
Í rannsókninni nýtti Nína sér gögn úr könnuninni, Heilsa og líðan Íslendinga, frá árunum 2007 og 2009 og kann hún Embætti Landlæknis bestu þakkir fyrir afnot af gögnunum. Þar horfði hún bæði til einstaklingstekna og heimilistekna fyrir skatta og líkamsþyngdarstuðuls. „Það eru lítil sem engin sjáanleg merki um tekjutengdan ójöfnuð hvað varðar líkamsþyngd á Íslandi árin 2007 og 2009 þegar einstaklingstekjur og heimilistekjur eru skoðaðar. Einu sjáanlegu merkin um slíkan ójöfnuð komu fram árið 2009 þegar kynin voru aðgreind en niðurstöður mínar frá því ári gefa til kynna að konur í lægri tekjuflokkum séu örlítið þyngri en konur í þeim hærri,“ segir Nína og bætir við að niðurstöðurnar séu því afar jákvæðar fyrir Íslendinga.
Leiðbeinandi: Tinna Laufey Ásgeirsdóttir, lektor við Hagfræðideild.