Þórólfur Matthíasson, prófessor við Hagfræðideild
Í framhaldi af bankahruninu hefur verið gagnrýnt hvernig rekstraraðilar mátu óefnislegar eignir í ársreikningum sínum á þenslutímanum. Sumir hafa fullyrt að þar hafi fyrirtæki einfaldlega verið að setja verðmiða á loftið í bólunni. Til óefnislegra eigna teljast þættir á borð við viðskiptavild og eignfærðar veiðiheimildir.
Þórólfur Matthíasson
Hann bendir á að hrun fjármálakerfisins á Íslandi sé eitt umfangsmesta fjármálahrun sem orðið hefur í veröldinni til þessa.
Þórólfur Matthíasson, prófessor í hagfræði, hefur sérhæft sig í hagfræði fiskveiðistjórnunar sem er án vafa einn umdeildasti málaflokkurinn á Íslandi í dag. Hann stýrir nú nýrri rannsókn sem snýst um að skoða þróun efnahags íslensku þjóðarinnar á árunum í kringum hrunið. Í því sambandi þarf sérstaklega að huga að umfangi framtalinna óefnislegra eigna samkvæmt skattframtölum íslenskra fyrirtækja á árabilinu 2003 til 2009.
„Norræna skattrannsóknaráðið ákvað árið 2009 að fjalla um skattalega meðhöndlun óefnislegra eigna á Norðurlöndum. Hugmyndin um að fjalla um þetta atriði kom frá tveimur af fulltrúum Íslands í skattrannsóknaráðinu, m.a. með hliðsjónaf þeim sviptingum sem höfðu orðið á hlutabréfamarkaði á Íslandi í aðdraganda og kjölfar hruns fjármálakerfisins 2008,“ segir Þórólfur.
Hann bendir á að hrun fjármálakerfisins á Íslandi sé eitt umfangsmesta fjármálahrun sem orðið hefur í veröldinni til þessa. „Það hefur vissulega mikla þýðingu að skilja gangvirki slíkra atburða. Það er sjálfsagt veik von að hægt sé að koma í veg fyrir bólumyndun á fjármálamörkuðum í framtíðinni. Meiri og betri þekking og skilningur á þessu getur hjálpað stjórnmálamönnum að sníða agnúa af reglum þannig að þær takmarki þann skaða sem almenningur verður fyrir vegna uppblásins fjármálamarkaðar,“ segir Þórólfur.
Hann bætir því við að rannsóknin sé í fullum gangi og því sé of fljótt að draga víðtækar ályktanir „þótt vissulega séu væntingar um að hægt verði að skilja betur en áður gangvirki hlutabréfabólu og þenslu.“