Darri Eyþórsson, BS frá Iðnaðarverkfræði-, vélaverkfræði- og tölvunarfræðideild og stjórnarformaður fyrirtækisins Úr sveitinni
Rannsóknin snýst um að kanna hagkvæmni og fýsileika þess að nýta affallstómata úr íslenskri garðyrkju í fyrsta flokks unnin matvæli eins og tómatsósu,“ segir Darri Eyþórsson, sem lauk BS-námi í efnaverkfræði í haust. Hann hlaut í fyrrasumar styrk úr Nýsköpunarsjóði námsmanna til þess að vinna að verkefninu „Betri nýting á affallsafurðum í grænmetisrækt.“
Honum og Einari Margeiri Kristinssyni matreiðslumanni hefur orðið tíðrætt um sóun á matvælamarkaði en þar hafa þeir lengi starfað. Nú starfa þeir hjá eigin fyrirtæki, Úr sveitinni. „Við ákváðum að láta til skarar skríða til þess að stemma stigu við sóun í matvælaframleiðslu,“ segir Darri en markmið verkefnisins var einnig að auka úrval af unnum matvælum úr íslensku hráefni.
Darri Eyþórsson
Darri hlaut í fyrrasumar styrk úr Nýsköpunarsjóði námsmanna til þess að vinna að verkefninu „Betri nýting á affallsafurðum í grænmetisrækt.“
„Niðurstöðurnar benda í stuttu máli til þess að það sé verulegur efnahagslegur grunnur fyrir innlenda matvælavinnslu sem nýtir uppskerustofna sem ellegar fara til spillis. Með þessum hætti má draga úr þeirri mengun sem verður til við förgun, minnka viðskiptahalla með framleiðslu og sölu á mætvælum sem eru í beinni samkeppni við innfluttar vörur og skapa störf á landsbyggðinni,“ segir Darri.
Þó að Darri segi lítið nýtt við það að búa til tómatsósu úr tómötum hafi slíkt aldrei verið gert til endursölu á Íslandi. „Markaðsrannsóknir sýna að eftirspurn er að aukast eftir innlendum matvælum úr íslensku hráefni. Einnig er þjóðhagslega hagkvæmt og í raun nauðsyn að nýta til fulls alla þá uppskerustofna sem ræktaðir eru hér á landi,“ segir Darri að lokum en verkefnið var eitt þeirra sem tilnefnd voru til Nýsköpunarverðlauna forseta Íslands í ár.
Leiðbeinandi: Guðjón Þorkelsson, dósent við Matvæla- og næringarfræðideild.