Ragnheiður Bragadóttir, prófessor við Lagadeild og formaður Norræna sakfræðiráðsins
Efnahagsbrot, skipulögð brotastarfsemi, spilling og áhrif kreppu á afbrot í þjóðfélaginu er meðal fjölmargra rannsóknarefna sem Norræna sakfræðiráðið, samnorræn rannsóknastofnun í afbrotamálum sem hefur aðsetur í Háskóla Íslands, fæst við.
Ragnheiður Bragadóttir, prófessor við Lagadeild Háskóla Íslands, gegnir formennsku í ráðinu um þessar mundir en ráðið á sér nokkuð langa sögu. „Norræna sakfræðiráðið var stofnað árið 1962 og markmið þess er að efla norrænar rannsóknir á sviði afbrotafræði, refsiréttar og skyldra greina og veita stjórnvöldum á Norðurlöndum upplýsingar til að byggja á stefnu í löggjöf og afbrotavörnum,“ segir Ragnheiður. Hún segir að ráðið veiti styrki, standi fyrir rannsóknum og ráðstefnum og gefi út skýrslur og tímarit á sviði áðurnefndra fræðigreina.
Ragnheiður Bragadóttir
„Norræna sakfræðiráðið var stofnað árið 1962 og markmið þess er að efla norrænar rannsóknir á sviði afbrotafræði, refsiréttar og skyldra greina og veita stjórnvöldum á Norðurlöndum upplýsingar til að byggja á stefnu í löggjöf og afbrotavörnum.“
Hvert hinna fimm norrænu ríkja á þrjá fulltrúa í ráðinu. Auk Ragnheiðar sitja Helgi Gunnlaugsson, afbrotafræðingur og prófessor í félagsfræði við Háskóla Íslands, og Kristrún Kristinsdóttir, fulltrúi frá innanríkisráðuneytinu, í ráðinu fyrir Íslands hönd. Ragnheiður segir starfið í ráðinu umfangsmikið, fjölbreytt og lifandi, enda felist í því mikil og góð samvinna við fræðimenn annars staðar á Norðurlöndunum.
Nýlega stóð ráðið fyrir samnorrænni rannsókn á afstöðu almennings til refsinga á Norðurlöndum. Í niðurstöðum hennar kom meðal annars fram að almenningur hefur ríka tilhneigingu til að vanmeta refsiþyngd dómstóla og velur sjálfur refsingu sem er yfirleitt vægari en sú refsing sem dómarar ákveða.
Skrifstofa Norræna sakfræðiráðsins er á 3. hæð í Lögbergi. Ráðið heldur einnig úti öflugri heimasíðu um rannsóknir sínar, www.nsfk.org.