Jakob Sigurðsson, doktorsnemi við Rafmagns- og tölvuverkfræðideild
„Takmarkið er að þróa nýjar aðferðir og tölfræðilíkön sem líkleg eru til þess að auka nákvæmni læknisfræðilegra gagna sem aflað er með aðstoð rafeindatækja. Það er til hagsbóta bæði fyrir lækna og sjúklinga,“ segir Jakob Sigurðsson, doktorsnemi við Rafmagns- og tölvuverkfræðideild, um doktorsrannsóknir sínar.
Jakob Sigurðsson
„Takmarkið er að þróa nýjar aðferðir og tölfræðilíkön sem líkleg eru til þess að auka nákvæmni læknisfræðilegra gagna sem aflað er með aðstoð rafeindatækja.“
„Rannsóknirnar snúast um þróun tölfræðilegra aðferða, einkum svokallaða óháða þáttagreiningu, sem m.a. nýta má til að greina læknisfræðileg gögn,“ segir Jakob, sem vonast til að honum og rannsóknarteyminu takist að þróa betri aðferðir á ákveðnum sviðum en þær sem fyrir eru í dag.
Jakob segir óháða þáttagreiningu ganga út á að taka fjölvítt blandað merki, þ.e. merki upprunnið úr mörgum áttum sem upphaflega mælist sem eitt merki, og greina í sína upprunalegu þætti. „Óháð þáttagreining gengur út á það að greina í sundur fjölvítt blandað merki og þannig fá sem mestar og bestar upplýsingar úr því. Óháða þáttagreiningu má t.d. nota á gögn frá starfrænni segulómmyndun (fMRI) til að einangra svæði í heilanum sem tengjast heyrn og sjón. Í slíkum tilfellum er einstaklingur örvaður með einhverju sjónrænu og síðan er beitt óháðri þáttagreiningu til að einangra þau svæði í heilanum sem best endurspegla örvunarmerkið. Einnig má beita óháðri þáttagreiningu á heilalínurit. Í því tilfelli er aðferðin nýtt til þess að fjarlægja suð og önnur óæskileg merki, t.d. frá augnhreyfingum, úr gögnunum,“ segir Jakob.
Leiðbeinandi: Magnús Örn Úlfarsson, lektor við Rafmagns- og tölvuverkfræðideild.