Kristján Þór Magnússon, aðjunkt við Íþrótta-, tómstunda- og þroskaþjálfadeild
Það er mikilvægt að auka og viðhalda því mikilvægasta í lífinu, heilsunni, á mikilvægasta æviskeiðinu, bernskunni,“ segir Kristján Þór Magnússon, aðjunkt við Íþrótta-, tómstunda- og þroskaþjálfadeild, sem á síðasta ári varði fyrstur manna doktorsritgerð í íþrótta- og heilsufræði við Háskóla Íslands.
Doktorsverkefnið hans byggðist m.a. á íhlutunarrannsókninni „Lífsstíll 7 til 9 ára barna“ sem snerist um að þróa leiðir til að auka hreyfingu og stuðla að hollara mataræði hjá börnum á þessum aldri. „Kveikjan að rannsókninni voru ekki síst niðurstöður rannsóknar á heilsu 9 og 15 ára barna á árunum 2003 og 2004. Þar kom í ljós að of fá börn hreyfðu sig samkvæmt ráðlögðum viðmiðum alla daga vikunnar,“ segir Kristján Þór og bendir einnig á að of þungum börnum fjölgaði ört í upphafi þessarar aldar.
Kristján Þór Magnússon
Það er mikilvægt að auka og viðhalda því mikilvægasta í lífinu, heilsunni, á mikilvægasta æviskeiðinu, bernskunni.“
Í rannsókninni var gripið til íhlutunar í þremur grunnskólum á árunum 2006-2008 til að sporna gegn kyrrsetu og óhollustu. Meginniðurstöður eftir íhlutunina voru þær að hún hafði lítil eða takmörkuð áhrif á hreyfingu, þrek eða holdafar barnanna á þessu tveggja ára tímabili þótt aðgerðirnar hafi skilað aukinni hreyfingu meðal þeirra á skólatíma. Meira þarf til. Kristján Þór bendir þó á að niðurstöðurnar sýni að vel sé hægt að samþætta hreyfingu betur almennu skólastarfi í grunnskólum án þess að það komi niður á öðru
námsefni.
„Það er sannarlega verðugt verkefni að finna og þróa leiðir sem auka hreyfingu og bæta lífsstíl yngstu kynslóðarinnar. Við búum við svipaðar aðstæður og aðrar vestrænar þjóðir þar sem kyrrseta og aukið framboð af ódýrum orkuríkum mat blandast í slæmum lífsstílskokteil. Því er ekki ólíklegt að aðferðir þróaðar hér, sem leiða til aukinnar hreyfingar og hollara mataræðis, nýtist ekki bara í okkar samfélagi heldur einnig í löndunum í kringum okkur,“ segir Kristján Þór.