Magnús Þorkelsson, doktorsnemi við Menntavísindasvið
„Lykillinn að því að geta valið um framhaldsskóla er búseta á höfuðborgarsvæðinu og góðar einkunnir úr grunnskóla,“ segir Magnús Þorkelsson, doktorsnemi í uppeldis- og menntunarfræðum. Hann rannsakar brotthvarf frá námi í framhaldsskólum landsins og leitar að ástæðum sem kunna að vera innbyggðar í kerfið, jafnvel bundnar í námskrá.
Magnús segir vandamálið bæði menningar- og samfélagslegt. Lífskjör, heilsa og líðan fólks með litla menntun sé að jafnaði lakari en þeirra sem betur eru menntaðir. Þegar bornar eru saman innritunartölur og tölur um brautskráða sést vel að brottfall er mikið. Hversu mikið það er er þó túlkunaratriði en almennt mat er að 25-30% innritaðra útskrifist aldrei úr framhaldsskóla. Löng leið er frá 10. bekk grunnskóla til útskriftar úr framhaldsskóla og fáir raunhæfir styttri valkostir eru á leiðinni. „Engu að síður hefur ekki verið kortlagt hvenær fólk hættir námi eða reynt að meta hvaða samfélagsleg áhrif skólaganga þess hefur haft þegar það hættir,“ segir Magnús.
Magnús Þorkelsson
Magnús rannsakar brotthvarf frá námi í framhaldsskólum landsins og leitar að ástæðum sem kunna að vera innbyggðar í kerfið, jafnvel bundnar í námskrá.
Vísbendingar eru um að stærsti hópur nemenda í 10. bekk hafi í raun næsta lítið val þegar kemur að því að hefja nám í framhaldsskóla. Þeir nemendur sem ýmist eru með lágar einkunnir úr grunnskóla eða með einhvers konar námshamlanir virðast í raun helst eiga kost á skólum sem næstir eru heimili þeirra og gildir þá einu hvort tekið er tillit til reglna um hverfisskóla eða ekki.
„Ég vildi kanna hvort nemendur sæju allt það sem er í boði,“ segir Magnús sem áður hafði kannað hvað réð vali nemenda í Flensborgarskóla á þeim skóla. Í ljós kom að ákveðnir valkostir réðu nokkru, s.s. íþróttaafrek skólans og fjölmiðlabraut, en mestu réð staðsetning. Hann vonast til að rannsóknin leiði til einhverra lausna á því mikla vandamáli sem brotthvarf er og að skýrari mynd komist á hugtakið „skóli fyrir alla.“
Leiðbeinandi: Börkur Hansen, prófessor við Uppeldis- og menntunarfræðideild.