Helga Lind Pálsdóttir, MA-nemi við Félagsráðgjafardeild
Einelti á sér margar birtingarmyndir. Ein sú nýjasta er svokallað rafrænt einelti sem m.a. hefur verið skilgreint sem einelti þar sem Netið og GSM-símar eru notaðir til að koma á framfæri niðrandi og ærumeiðandi upplýsingum um einstakling. Rafrænt einelti er viðfangsefni
Helgu Lindar Pálsdóttur, MA-nema í félagsráðgjöf, í lokaverkefni hennar.
„Markmiðið í rannsókninni var að skoða skilning og þekkingu unglinga á rafrænu einelti og hvernig rafrænt einelti birtist unglingum í daglegu lífi,“ segir Helga en rannsóknin er sú fyrsta hér á landi sem gerð er út frá sjónarhorni unglinga.
Helga Lind Pálsdóttir
„Markmiðið í rannsókninni var að skoða skilning og þekkingu unglinga á rafrænu einelti og hvernig rafrænt einelti birtist unglingum í daglegu lífi.“
Helga bendir á að rafrænt einelti sé oft sett undir sama hatt og hefðbundið einelti og að nauðsynlegt sé að gera greinarmun þar á. Sem dæmi nefnir Helga: „Í hefðbundnu einelti er nokkuð auðvelt að telja hversu oft atvik á sér stað og þannig skilgreina það sem endurtekið. Í rafrænu einelti er það ekki svo auðvelt. Netið er þess eðils að efni sem fer þar inn er aðgengilegt mörgum og dreifist mjög hratt á milli fólks. Þannig getur atvik, sem átti aðeins að vera einu sinni af hálfu geranda, orðið að margendurteknum skaða eða áreitni fyrir þolanda.“
Í rannsókninni heimsótti Helga tvo grunnskóla og tók hópviðtöl við nemendur á unglingastigi. Hún komst meðal annars að því að rafrænt einelti fer helst í gegnum miðla þar sem gerandi getur verið nafnlaus, eins og samskiptavefinn Formspring.me og nafnlaus smáskilaboð. „Niðurstöður benda auk þess til þess að unglingar hafi takmarkaðan skilning og þekkingu á rafrænu einelti og að þörf sé á aukinni fræðslu. Rannsóknin sýnir einnig að nafnleyndin sem oft fylgir rafrænu einelti kunni að vera stór áhrifaþáttur og ein helsta ástæða þess að unglingar lenda í eða taka þátt í rafrænu einelti. Nafnleyndin hefur einnig í för með sér að erfitt er að takast á við rafrænt einelti og
afleiðingar þess,“ segir Helga.
„Ég tel mikilvægt fyrir foreldra, skólastjórnendur, kennara, félagsráðgjafa og annað fagfólk sem vinnur með börnum og unglingum að kynna sér betur efni um rafrænt einelti og finna leiðir til að vinna markvisst gegn því,“ segir Helga að lokum.
Leiðbeinendur: Halldór S. Guðmundsson, lektor við Félagsráðgjafardeild, og Kristrún Birgisdóttir, sérfræðingur í mennta- og menningarmálaráðuneytinu.