Annars hugar: Roberto Luigi Pagani

Roberto Luigi Pagani, aðjunkt og doktorsnemi við Íslensku- og menningardeild Háskóla Íslands, flytur opinn fyrirlestur um þýðingu sína á þjóðsögum úr safni Jóns Árnasonar. Haldið í fyrirlestrasal Eddu, miðvikudaginn 30. október kl. 15:00-16:00.

Þýðing Roberto var gefin út á Ítalíu fyrr á þessu ári. Í fyrirlestrinum segir hann meðal annars frá erfiðleikum sem felast í því að þýða íslensk hugtök og ákvörðunum hans og útgefandans við þýðinguna, markmiði útgáfunnar og mikilvægi þessara sagna til að dreifa þekkingu um íslenska menningu.

Fyrirlesturinn er haldinn í fyrirlestraröðinni Annars hugar sem haldin er á vegum námsgreinarinnar Íslenska sem annað mál í samstarfi við Árnastofnun og Málvísindastofnun Háskóla Íslands. Annars hugar er fyrirlestraröð fyrir öll sem tala íslensku, töluðu íslensku eða vilja tala íslensku. Það er ekkert mál að eiga íslensku sem annað mál.

Verið öll velkomin!