Kvikmyndasýning: 5 Broken Cameras

Námsleið í Mið-Austurlandafræðum við Mála- og menningardeild HÍ býður til sýningar á heimildamyndinni 5 Broken Cameras í Auðarsal í Veröld kl. 16:30 í dag, mánudag. Myndin er samvinnuverkefni Palestínumannsins Emad Burnat og Guy Davidi frá Ísrael og nær yfir fimm ár þar sem Emad fylgist með mótmælum í Bil´in á Vesturbakkanum. Verið öll velkomin.

5 Broken Cameras hefur tekið þátt í fjölda alþjóðlegra kvikmyndahátíða og unnið til verðlauna, svo sem World Cinema Directing Award á Sundance Film Festival 2012. Hún var einnig tilnefnd til verðlauna sem besta heimildamyndin á Óskarsverðlaunahátðinni 2013. Sú tilnefning vakti deilur um eiginlegt þjóðerni myndarinnar þegar henni var hampað sem rós í hnappagat ísraelskar kvikmyndagerðar, jafnvel þó myndin segi frá átökum og aðskilnaðarmúrum á Vesturbakkanum.

Stutt kynning á myndinni og sögusviðinu verður haldin fyrir sýninguna. Aðgangur er ókeypis.