Einkaskjalasöfn og merking þeirra
![Einkaskjalasöfn og merking þeirra - á vefsíðu Háskóla Íslands](https://www.hi.is/sites/default/files/styles/efsta_mynd___vi_bur_um/public/einkaskjalasofn._hverju_er_safnad_og_merking_hlutanna.jpg?itok=JH48v11I)
Þjóðminjasafn Íslands
Sigurður Gylfi Magnússon, prófessor í menningarsögu við Deild heimspeki, sagnfræði og fornleifafræði Háskóla Íslands, flytur opinn fyrirlestur í Þjóðminjasafni Íslands. Fyrirlesturinn er öllum opinn auk þess sem hægt verður að fylgjast með honum í streymi.
Í erindinu mun Sigurður Gylfi fara yfir hugmyndir fólks um hluti sem það safnar og spyr: Hverju söfnum við að okkur? Hver er merking hlutanna fyrir einstaklingana? Til að svara spurningunum leitar Sigurður Gylfi meðal annars í efni sem tilheyrði afa hans, Helga Magnússyni járnsmiði og kaupmanni í Reykjavík. Helgi fæddist á 19. öld í íslenska bændasamfélaginu en gerðist síðar góðborgari í Reykjavík á fyrri hluta 20. aldar. Hann skildi eftir sig safn mynda – nokkurs konar arkíf – sem Sigurður Gylfi rýnir í til að sýna fram á hversu mikilvægt er að hægja á rannsóknarferlinu til að öðlast dýpri skilning á hversdagslegri upplifun fólks á efnisveruleikanum.
Sigurður Gylfi er verkefnisstjóri öndvegisverkefnisins Heimsins hnoss, en samnefnd sýning stendur nú yfir í Þjóðminjasafni Íslands og er ætlað að miðla afrakstri rannsókna verkefnisins, sem hópur fræðimanna tók þátt í. Með erindi sínu bindur Sigurður Gylfi endahnútinn á fyrirlestraröð þá sem haldin hefur verið í tengslum við sýninguna.
Sigurður Gylfi Magnússon, prófessor í menningarsögu við Deild heimspeki, sagnfræði og fornleifafræði Háskóla Íslands.
![Einkaskjalasöfn og merking þeirra](https://www.hi.is/sites/default/files/styles/mynd___kassa_fyrir_fr_ttir_/public/vidburdir/63p4p.jpg?itok=oUKbcRI5)