Náms- og starfsráðgjöf

Félagsvísindasvið

Náms- og starfsráðgjöf

MA – 120 einingar

Náms– og starfsráðgjafar veita fólki á öllum aldri ráðgjöf og stuðning við að finna sína leið og ná árangri. Þeir starfa á fjölbreyttum og vaxandi starfsvettvangi sem er í stöðugri mótun. Ráðgjöfin miðar að því að efla sjálfsþekkingu og aðstoða fólk við að bera kennsl á og virkja styrkleika sína og áhugasvið, takast á við breytingar og hindranir og taka ígrundaðar ákvarðanir um nám- og störf.

Flest námskeið eru kennd í staðnámi en nemendur utan höfuðborgarsvæðisins geta sótt um að taka þátt í kennslustundum í streymi. Tvisvar á misseri eru staðlotur með skyldumætingu.

Sækja um nám

Show Um hvað snýst námið?

Meistaranámið í náms- og starfsráðgjöf er öllum opið sem hafa lokið grunnnámi á háskólastigi með fyrstu einkunn. Í náminu fá nemendur fræðilega og verklega menntun og að námi loknu geta nemendur sótt um lögverndað starfsheiti. Stór hluti námsins felst í starfsþjálfun sem fer fram á vettvangi undir handleiðslu náms- og starfsráðgjafa.

Í náminu er fjallað um hvernig náms- og starfsferill fólks mótast í samspili á milli einstaklingsins og umhverfis hans. Nálgunin er þverfræðileg og byggist á sálfræði, menntunarfræði og félagsfræði. Jafnframt er fjallað um skóla- og menntakerfið og vinnumarkaðinn. Lögð er áhersla á margbreytileika fólks og inngildingu. Nemendur læra starfsaðferðir náms- og starfsráðgjafa og kynnast ólíkum starfsvettvöngum.

Uppbygging náms

Námið er 120 einingar og er skipulagt sem fullt nám til tveggja ára, en hægt er að ljúka því á lengri tíma.

Námið samanstendur af fræðilegum námskeiðum, vettvangsnámi og lokaverkefni. Stór hluti námsins er verklegur og á lokamisserinu fara nemendur í 200 stundir í starfsþjálfun á vettvang undir handleiðslu náms- og starfsráðgjafa.

Athugið! Megindleg aðferðarfræði er forkrafa fyrir þau sem hafa minna en 10 einingar í megindlegri aðferðafræði úr grunnnámi og hægt að nýta sem val í MA–námi í náms- og starfsráðgjöf. Nemendur sem hafa lokið að minnsta kosti 10 einingum í megindlegri aðferðafræði í grunnnámi taka önnur valnámskeið 8-10 einingar.

Meðal viðfangsefna

Ráðgjöf við einstaklinga og hópa
Margbreytileiki og félagsleg réttindi
Kenningar um starfsþróun
Persónulegar og félagslegar áskoranir
Náms- og starfsfræðsla
Íslenska menntakerfið
Kenningar um áhugasvið
Farsæl skólaganga og brotthvarf
Upplýsinga- og samskiptatækni í ráðgjöf
Rannsóknaraðferðir
Hindarnir í námi og starfi
Skólakerfið
Símenntun

Fyrirkomulag kennslu

Námið er kennt á íslensku en flestar bækur eru á ensku.

Flest námskeið eru kennd í staðnámi en nemendur utan höfuðborgarsvæðisins geta sótt um að taka þátt í kennslustundum í streymi samkvæmt stundaskrá (rauntími). Stöku námskeið eru kennd í fjarnámi. Tvisvar á misseri er skyldumæting í staðlotur þvert á námskeið. Sjá nánar um námsform undir hverju námskeiði.

Vegna fjöldatakmarkana eru einungis 40 nemendur teknir inn í námið.

Meginmarkmið

Meginmarkmið námsins er að búa nemendur sem best undir að starfa sem náms- og starfsráðgjafar á fjölbreyttum starfsvettvangi.

Annað

Námið veitir aðgang að doktorsnámi.

Show Inntökuskilyrði

Inntökuskilyrði námsleiðar

BA-, B.Ed- eða BS-gráðu eða sambærilega gráðu með fyrstu einkunn. Umsækjendur sem lokið hafa námi, sem ekki er á einu af eftirtöldum þekkingarsviðum: Sálfræði, menntun og menntakerfi, tengsl einstaklings og samfélags eða hafa ekki lokið a.m.k. 10 ECTS einingum í megindlegri aðferðafræði, gætu þurft að ljúka einu til þremur námskeiðum (hámark 30 ECTS) á fyrrgreindum sviðum. Ef nemandi þarf að bæta við sig námskeiðum, þarf það að fara fram samhliða náminu. Það telst ekki vera hluti af eiginlegu meistaranámi. Undantekning: FMÞ001F Megindleg aðferðafræði er hægt er að nýta sem val. Hámark 40 nemendur geta hafið nám að hausti.

Ef þeir sem sækja um að hefja MA nám í náms- og starfsráðgjöf, og uppfylla inntökuskilyrði, eru fleiri en unnt er að taka inn skal val nemenda byggjast á eftirtöldum sjónarmiðum:

Einkunnum í háskóla.
Starfsreynslu.
Meðmælum frá vinnuveitanda ef umsækjandi hefur starfsreynslu, annars frá kennara umsækjanda í háskóla.
Persónulegum greinargerðum um forsendur og áhugasvið.
Viðtölum ef þurfa þykir.
Að auki er heimilt að líta til dreifingar umsækjenda hvað varðar fyrstu prófgráðu, þannig að hlutfall nemenda verði sem jafnast með tilliti til greina sem þeir hafa lokið til BA-, B.Ed.- eða BS-gráðu.

Reglur um inntöku nemenda.

Ráðgjafarkenningar (NSR007F)

Í námskeiðinu er farið yfir helstu ráðgjafarkenningar og hvernig hægt er að nýta þær til að greina samskipti og viðfangsefni í ráðgjöf. Hugmyndasaga ráðgjafarkenninga er rakin frá sálgreiningu til síðnútíma. Einnig er fjallað um sögu náms- og starfsráðgjafar á Íslandi. Rýnt verður í áhrif fjölmenningar og kynferðis á kenningasmíð og ráðgjöf. Nemendur vinna verkefni sem miða að því að móta og greina eigin ráðgjafarstíl.

Nánar um námskeiðið

Náms- og starfsferill, inngrip og mat (NSR009F)

Kynntar eru helstu kenningar og nýlegar rannsóknir um farsæla skólagöngu og brotthvarf frá námi í ljósi íslenskrar menntastefnu og margbreytileika nemenda. Jafnframt er fjallað um áætlun í náms- og starfsráðgjöf með áherslu á náms- og starfsfræðslu og horft til framkvæmdar hennar í nágrannalöndunum á undanförnum árum. Nemendur kynnast upplýsingaveitum um nám og störf og mati á skilvirkni náms- og starfsráðgjafar. Auk þess er umfjöllun um stöðu, þróun og framtíðarhorfur á íslenskum vinnumarkaði.

Nánar um námskeiðið

Vettvangur I: Samhengi (NSR107F)

Nemendur fá innsýn í störf og hlutverk náms- og starfsráðgjafa á fjölbreyttum vettvangi í fjölmenningarsamfélagi. Sömuleiðis inn í samhengi ólíkra stofnana og samvinnu við aðrar fagstéttir, lagaramma og siðaviðmið. Helstu verkþættir starfs náms- og starfsráðgjafa eru kynntir og innsýn gefin í vinnulag og aðferðir á vettvangi. Grunnur er lagður að starfsþróun nemenda með faglegri ígrundun sem byggir á viðhorfum, persónulegri reynslu, gildismati og menningarlegum uppruna þeirra.

Nánar um námskeiðið

Megindleg aðferðafræði (FMÞ001F)

Meginefni námskeiðsins eru megindlegar rannsóknaraðferðir og tölfræði í félags- og menntavísindum. Lögð er áhersla á virka þátttöku nemenda og umfjöllun um þátt rannsókna í samfélaginu. Fjallað er um helstu rannsóknarsnið, úrtaksfræði og gerð spurningalista. Í tölfræðihluta er kennt um lýsandi tölfræði og ályktunartölfræði og fjallað ítarlega um dreifigreiningu og aðhvarfsgreiningu. Nemendur vinna hagnýt verkefni í tölfræðilegri úrvinnslu gagna með jamovi forritinu samhliða fyrirlestrum. Nemendur geta unnið með eigin gögn.

Nánar um námskeiðið

Starfsferilskenningar (NSR212F)

Kenningar um þróun og sköpun starfsferils eru þungamiðja þessa námskeiðs, með sérstakri áherslu á nýjustu hræringar á fræðasviðinu. Farið er ítarlega í fræðilegar undirstöður kenninga um starfsferilinn Áhersla er lögð á hagnýtingu kenninga um þróun starfsferils, og helstu verkfæri kynnt. Rannsóknir tengdar kenningum og hagnýtingu þeirra eru kynntar ásamt helstu álitamálum á fræðasviðinu.

Nánar um námskeiðið

Persónulegir og félagslegir erfiðleikar (NSR203F)

Meginviðfangsefni námskeiðsins eru persónulegir og félagslegir erfiðleikar barna og ungmenna og horfur á fullorðinsárum. Kynntar eru helstu skilgreiningar á og algengi hegðunar-, tilfinninga- og námserfiðleika með tilliti til fræða og alþjóðlegra flokkunarkerfa. Jafnframt er fjallað um áhættu- og vernandi þætti, seiglu og forvarnir. Áhersla er lögð á margbreytileika hópa. Nemendur kynnast viðeigandi úrræðum með áherslu á gagnreyndar aðferðir og samráð fagstétta.

Nánar um námskeiðið

Vettvangur II: Samskipti (NSR210F)

Nemendur kynnast starfi og hlutverki náms- og starfsráðgjafa á vettvangi, helstu verkþætti náms- og starfsráðgjafa, skipulag þjónustunnar og aðferðir sem beitt er í námsog starfsráðgjöf. Fjallað er um einkenni upplýsingasamfélagsins, færni og aðferðir við öflun og miðlun upplýsinga um nám og störf. Nemendur kynnast kenningum um áhugahvöt, sjálfsmynd, markmið og vinnubrögðum í námi. Ítarlega er farið í virka hlustun, samband ráðgjafa og ráðþega, samskiptalíkön kynnt og grunnatriði tengd samskiptum í ráðgjöf æfð. Hlutverk náms- og starfsráðgjafar í fjölmenningarsamfélagi er samþætt í alla efnisþætti.

Nánar um námskeiðið

Málstofa um meistararitgerð II (NSR029F)

Málstofa

Nánar um námskeiðið

Megindlegar rannsóknaraðferðir I (MVS302F)

Markmið
Að nemendur þekki og geti beitt algengustu tölfræðiaðferðum við úrvinnslu gagna og geti metið tölfræðilegar niðurstöður. Að nemandi hafi kunnáttu og þekkingu til þess að greina og miðla tölulegum upplýsingum skv. APA útgáfustaðlinum (t.d. í lokaritgerð) og geti sýnt frumkvæði við tölfræðilega úrvinnslu gagna. Einnig að nemendur kynnist helstu rannsóknarsniðum í megindlegri aðferðafræði.

Inntak og viðfangsefni
Fjallað verður um megindlegar rannsóknaraðferðir og rannsóknarsnið. Í tölfræði verður mest áhersla lögð á fylgni og fjölbreytuaðhvarfsgreiningu. Einnig verður unnið með aðferðir dreifigreiningar og þáttagreiningar (leitandi og staðfestandi). Að lokum verða nemendur kynntir fyrir grunnhugsun Bayesískrar tölfræði og mati á heildarvillu (e. Total survey error). Nemendur læra að vinna greiningar með tölfræðiforriti. Sérstök áhersla verður á túlkun gagnasafna sem tengjast jafnréttismálum og inngildandi menntun.

Vinnulag
Námskeiðið verður kennt vikulega á fjarfundum. Tvær staðlotur eru á önninni. Skyldumætingu er í staðlotunum. Þeir sem eiga um langan veg að fara geta tekið þátt í staðlotunum í fjarfundi. Nemendur verða að hafa nýjustu stöðugu (e. solid) útgáfu af Jamovi (sjá jamovi.org) uppsetta á fartölvum sem þeir mæta með í kennslustundir.

Nánar um námskeiðið

Eigindlegar rannsóknaraðferðir I (FMÞ103F)

Markmið námskeiðsins er að nemendur kynnist fjölbreytileika og fræðilegum forsendum eigindlegrar rannsóknahefðar í félagsvísindum og öðlist reynslu í að beita eigindlegum aðferðum. Um hagnýtt námskeið er að ræða þar sem hver nemandi vinnur sjálfstætt rannsóknarverkefni sem felst í því að hanna og undirbúa rannsókn, afla gagna, greina þau og skrifa um helstu niðurstöður undir handleiðslu kennara. Í námskeiðinu verður farið ítarlega í undirbúning rannsókna, gerð rannsóknaráætlunar, gagnaöflun, greiningu og skrif.

Nánar um námskeiðið

Vettvangur III: Samfélag (NSR411F)

Fjallað er um samskipti við ráðþega og uppbyggingu samtala. Farið er ítarlega í hugtök sem lögð eru til grundvallar við greiningu á ráðgjafarviðtölum og viðbrögðum ráðþega og þau æfð með markvissum hætti ásamt fjölmenningarlegum nálgunum. Ráðgjafarferlið er nánar kynnt og nemendum kennt að meta eigin frammistöðu í samskiptum við ráðþega og aðra. Fjölbeyttar aðferðir við mat á vanda ráðþega eru kynntar ásamt markmiðssetningu í ráðgjöf. Fjallað er um aðferðir og leiðir í rafrænni ráðgjöf ásamt siðferðilegum álitamálum. Nemendur kynnast hópráðgjöf og ráðgjafarsamskiptum í rafrænum samfélögum Áfram er haldið vinnu nemenda að eigin starfsþróun sem sérfræðingur á sviði náms- og starfsráðgjafar.

Nánar um námskeiðið

Vettvangur IV: Handleiðsla (NSR412F)

Meginviðfangsefni námskeiðsins eru tengsl kenninga og fræða við aðferðir í ráðgjöf. Fjallað er um hópráðgjöf, notkun matstækja, siðferðilega fleti starfsins sem og starfsþróun nemenda í faglegu tilliti í fjölmenningarsamfélagi. Að auki verður fjallað um þær stofnanlegu og samfélagslegu hindranir sem verða á vegi fólks við þróun og sköpun starfsferils. Nemendur starfa undir handleiðslu náms- og starfsráðgjafa á vettvangi (grunnskóla, framhaldsskóla, háskóla, vinnumarkaði) í 200 stundir.

Nánar um námskeiðið

Öll fög eru skyldufög nemaVValfagBBundið val er háð skilyrðum ENámskeiðið er ekki kennt á misserinuNámsleiðin í Kennsluskrá

Mögulegt framhaldsnám með þína menntun

Bóka viðtal í náms-og starfsráðgjöf

Hvað segja nemendur?

Anna Lóa Ólafsdóttir, atvinnulífstengill hjá VIRK starfsendurhæfingarsjóði

Náms- og starfsráðgjöf

Ég útskrifaðist úr náms- og starfsráðgjöf vorið 2008 og hef aðallega unnið við að aðstoða fólk í atvinnuleit, við val á námi og að vera stuðningur þegar einstaklingar eru að takast á við miklar breytingar. Námið reyndist góður undirbúningur varðandi starfsþróun og áhugasvið einstaklinga og þegar kemur að algengum hindrunum í atvinnuleit. Elska starfið mitt og lít oft á það sem forréttindi að fá að vera til staðar fyrir einstaklinga sem eru að taka þessi mikilvægu skref í lífi sínu.

—