María J. Gunnarsdóttir, sérfræðingur við Vatnaverkfræðistofu Háskólans
„Þessi rannsókn er mikilvæg fyrir lýðheilsu og til að auka lífsgæði og verja íbúa Evrópu og annarra heimsálfa gegn sjúkdómum af völdum mengaðs neysluvatns. Það er mjög mikilvægt að þróa tækni til að greina þær örverur sem valda sjúkdómum í vatninu fljótt og örugglega.“ Þetta segir María J. Gunnarsdóttir um verkefnið Aquavalens eða Heilnæmt vatn. Hún og Sigurður M. Garðarsson, prófessor við Umhverfis- og byggingarverkfræðideild, munu vinna að þessu verkefni. Ætlunin með verkefninu er að finna fljótvirkar aðferðir til að greina sjúkdómsvaldandi örverur í neysluvatni. Þessar aðferðir verða prófaðar hjá litlum og stórum vatnsveitum og að auki hjá matvælafyrirtækjum sem mörg hver nota mikið vatn við framleiðsluna.
María J. Gunnarsdóttir
„Hlutverk Háskóla Íslands í verkefninu er að meta árangur en í því felst m.a. að skoða hvort vatnsgæði aukist með nýrri tækni og einnig hvort aukin gæði skili bættri lýðheilsu.“
„Hlutverk Háskóla Íslands í verkefninu er að meta árangur en í því felst m.a. að skoða hvort vatnsgæði aukist með nýrri tækni og einnig hvort aukin gæði skili bættri lýðheilsu. Okkar framlag verður einnig að útbúa leiðbeiningar um hvernig best sé að laga þessa nýju tækni að núverandi starfsemi vatnsveitna svo að hún verði hluti af fyrirbyggjandi innra eftirliti.“
Að sögn Maríu eru árlega skráð um 330.000 veikindatilfelli af völdum mengaðs neysluvatns í Evrópu þrátt fyrir að neysluvatn sé að jafnaði gott í álfunni. Að auki sé vitað að stór hluti veikindatilfella sé ekki skráður.
„Það tekur nú a.m.k. tvo daga að greina hvort vatn er mengað og oft er búið að neyta þess í miklum mæli áður en niðurstöðurnar koma. Þær aðferðir sem nú tíðkast byggjast á að greina vísa um mengun en verkefnið okkar gengur út á að þróa fljótvirkari aðferðir til að greina strax örverurnar sem valda sjúkdómum. Nýjar lausnir yrðu þá hrein viðbót við núverandi aðferðir,“ segir María.
Verkefnið er styrkt af sjöundu rammaáætlun Evrópusambandsins og þátttakendur eru 39 frá 13 þjóðlöndum. Verkefninu er skipt niður í fimmtán vinnsluhluta og stýrir Vatnaverkfræðistofa Háskóla Íslands einum þeirra. Vatnaverkfræðistofan hefur verið virk í rannsóknum á öryggi neysluvatns undanfarin ár.