Eggert Gunnarsson, Tilraunastöð Háskóla Íslands í meinafræði að Keldum
Óþekktur sjúkdómur kom upp í hrossum á vormánuðum 2010 og af þeim sökum var Landsmóti hestamanna, stærsta viðburði hestamennsku á Íslandi, frestað um ár. Í fyrstu var talið að um veirusýkingu væri að ræða en rannsóknir Eggerts Gunnarssonar, dýralæknis og bakteríusérfræðings, og samstarfsmanna hans á Keldum leiddu hið rétta í ljós.
„Sjúkdómurinn er bráðsmitandi og lýsir sér sem útferð úr nefi og þurr hósti. Hestarnir urðu í sumum tilvikum þreklitlir en veiktust ekki mikið að öðru leyti. Yfirleitt fengu þeir t.d. hvorki hita né misstu átlyst,“ segir Eggert sem starfar sem deildarstjóri sýkla-, sníkjudýra- og meinafræðideildar Tilraunastöðvar Háskóla Íslands í meinafræði að Keldum.
Eggert Gunnarsson
Eggert segir sjúkdóminn nýjan hér á landi þó svo að bakterían sjálf, Streptococcus equi subsp. zooeidemicus, hafi oft fundist hér áður. Erlendis hafa 40 afbrigði bakteríunnar verið greind í hrossum með sameindalíffræðilegum aðferðum.
„Við ræktuðum ákveðna bakteríu, svokallaðan tækifærissýkil, en líklega er þessi baktería aðalorsök þessa sjúkdóms. Svipaður sjúkdómur er þekktur í hrossum erlendis en þá oftast sem kjölfarssýking, þ.e. sjúkdómur sem fylgir í kjölfar annars sjúkdóms. Svo virðist að hér sé um frumorsök að ræða.“
Eggert segir sjúkdóminn nýjan hér á landi þó svo að bakterían sjálf, Streptococcus equi subsp. zooeidemicus, hafi oft fundist hér áður. Erlendis hafa 40 afbrigði bakteríunnar verið greind í hrossum með sameindalíffræðilegum aðferðum. „Rannsóknir okkar hafa sýnt að nýtt afbrigði bakteríunnar hefur borist hingað til lands, væntanlega með fólki, reiðtygjum eða hönskum, og smitað mjög næman hrossahóp. Bakterían
getur lifað utan hýsilsins í nokkra mánuði. Í örfáum tilfellum hefur sjúkdómurinn dregið hross til dauða og vísbendingar eru um að smit hafi borist í aðrar dýrategundir og menn.“