Snjólfur Ólafsson, prófessor við Viðskiptafræðideild og Eyþór Ívar Jónsson, framkvæmdastjóri Klaks
Eitt af meginverkefnum Íslendinga eftir efnahagshrunið 2008 er að fjölga störfum í landinu. Margir geta haft áhrif á það hve mörg störf skapast en ríkisstjórn og Alþingi eru þar í fararbroddi, að sögn þeirra Snjólfs Ólafssonar, prófessors í Viðskiptafræðideild, og Eyþórs Ívars Jónssonar, framkvæmdastjóra Klaks. „Hlutverk stjórnvalda og Alþingis er reyndar að skapa forsendur fyrir því að mörg störf skapist miklu frekar en að skapa sjálf störfin,“ segir Snjólfur en þeir Eyþór hafa unnið að rannsóknum á aðstæðum atvinnulífs hér á landi í framhaldi af hruninu.
Snjólfur og Eyþór hafa reynt að draga fram meginatriði um þetta flókna mál í rannsóknum sínum, en málið hefur margar hliðar. Að sögn Snjólfs er margt sem tengist því umdeilt, menn meti ástandið á ólíkan hátt og hagsmunir togist á þannig að ekki sé mögulegt að komast að einhlítri niðurstöðu. Engu að síður megi greina ýmis meginatriði sem hægt sé að færa margs konar rök fyrir.
Snjólfur Ólafsson
Eitt af meginverkefnum Íslendinga eftir efnahagshrunið 2008 er að fjölga störfum í landinu. Margir geta haft áhrif á það hve mörg störf skapast en ríkisstjórn og Alþingi eru þar í fararbroddi.
Fræðimenn, stjórnmálamenn og talsmenn ýmissa hagsmunasamtaka eru sammála um að öflug nýsköpun sé lykilatriði varðandi störf í framtíðinni að sögn Snjólfs. Hann metur það svo að ýmislegt gott hafi verið gert til að efla nýsköpun á Íslandi eftir hrun en leggja megi enn meiri áherslu á það. „Þetta, ásamt áherslu á að skapa gott rekstrarumhverfi, eru má segja hefðbundnar ályktanir um sköpun nýrra starfa,“ segir Snjólfur.
Eftir efnahagshrunið eru aðstæður um margt sérstakar á Íslandi að sögn Snjólfs. „Í rannsóknum okkar drögum við fram nokkur atriði til viðbótar sem færa má rök fyrir að séu mikilvæg um þessar mundir. Við bendum á mikilvægi þess að fá erlenda fjárfestingu inn í landið og að halda áfram virkjun orkuauðlinda landsins, enda þótt það þurfi að gerast í allt öðrum takti en var á árunum fyrir hrun. Við bendum einnig á afar mikilvægt atriði sem er að ljúka mörgum verkefnum hratt og að forðast að setja óþörf verkefni af stað,“ segir Snjólfur.
„Verkefnin sem þarf að vinna og ljúka sem fyrst eru ærin, þó ekki væri nema þau sem tengjast greiðsluvanda heimila og fyrirtækja. Þeim verkefnum er ekki hægt að ljúka þannig að allir verði sáttir, en mikilvægt er að hraða lausn þeirra eins og mögulegt er. Þeir sem eru með þessi verkefni á sinni könnu þurfa að fá betri vinnufrið til að klára þau eins og þeir telja best,“ segir Snjólfur.