Bryndís Baldvinsdóttir, M.Ed. frá Kennaradeild
Söngur er stór hluti af starfi í leikskólum landsins og þar þroska börn söngfærni sína. Þessi þáttur leikskólastarfsins var Bryndísi Baldvinsdóttur innblástur að meistararannsókn í leikskólakennarafræði en þar sameinaði hún reynslu sína sem tónmenntakennari, kórstjóri og leikskólakennari.
„Í rannsókninni skoðaði ég raddsvið og söngfærni 5–6 ára leikskólabarna. Ég lagði fyrir þau söngfærnipróf þar sem ég skoðaði sérstaklega raddsvið, tónnákvæmni og hvernig börnunum gekk að læra nýtt sönglag með og án söngtexta,“ útskýrir Bryndís. Söngfærniprófið er hluti alþjóðlegs samstarfsverkefnis um söngrannsóknir sem nær til fimmtán landa og leiðbeinandi Bryndísar, Helga Rut Guðmundsdóttir, stýrir íslenska hlutanum. „Mér bauðst að vera þátttakandi í samstarfsverkefninu og vissi að þannig gæti ég lagt mitt af mörkum til söngrannsókna á íslenskum börnum,“ segir Bryndís.
Bryndís Baldvinsdóttir
„Í rannsókninni skoðaði ég raddsvið og söngfærni 5–6 ára leikskólabarna. Ég lagði fyrir þau söngfærnipróf þar sem ég skoðaði sérstaklega raddsvið, tónnákvæmni og hvernig börnunum gekk að læra nýtt sönglag með og án söngtexta.“
Niðurstöður Bryndísar sýna að marktækur munur var á tónnákvæmni barnanna eftir aldri. „Einnig var marktækur munur á sungnum tónbilum eftir kyni en þar voru drengir nákvæmari en stúlkur. Ekki reyndist marktækur munur á leikskólum með eða án tónlistarkennara þegar áhrif aldurs og kyns eru tekin til greina en börnin sem höfðu tónlistarkennara í leikskólanum sungu þó fjölbreyttari lög,“ segir Bryndís og bætir við: „Þegar börnunum var kennt nýtt, óþekkt sönglag lærðu þau meira af nýja sönglaginu án söngtexta en með söngtexta. Niðurstöðurnar sýndu einnig að íslensk börn syngja á dýpra og breiðara raddsviði en börn í samsvarandi erlendum rannsóknum.“
Bryndís bendir á að rannsóknin sé sú fyrsta sinnar tegundar á Íslandi og hún hafi hagnýtt gildi fyrir þá sem starfa með syngjandi börnum, s.s. kórstjóra og leikskólakennara. „Niðurstöðurnar voru notaðar til þess að bæta söngfærniprófið sem lagt var fyrir börnin en söngfærnipróf sem þetta gerir rannsakendum mögulegt að skoða söng- og raddþroska barna á alþjóðlega vísu. Íslensku gögnin eru líka liður í því að gera samanburð mögulegan á milli þjóða og með tímanum er stefnt að því að upptökur verði aðgengilegar í alþjóðlegum gagnabanka með söng barna víðs vegar úr heiminum,“ segir Bryndís að lokum.
Leiðbeinandi: Helga Rut Guðmundsdóttir, lektor við Kennaradeild.