Stærðfræðinemar úr HÍ hlutskarpastir í forritunarkeppni háskólanna

Þrír stærðfræðinemar úr Háskóla Íslands urðu hlutskarpastir í íslenska hluta forritunarkeppninnar Nordic Collegiate Programming Contest (NCPC) sem fram fór í Háskólanum í Reykjavík á dögunum. Þeir stefna á þátttöku í evrópskri forritunarkeppni síðar í haust.

Liðið er skipað þeim Arnari Ágústi Kristjánssyni, Kára Rögnvaldssyni og Bjarka Baldurssyni Harksen en þeir sigruðu jafnframt í forritunarkeppni Háskóla Íslands nýverið. Þeir félagar kepptu undir nafninu „f slanga strik“ í NCPC sem lýsa má sem nokkurs konar Norðurlandamóti háskóla í forritun. Þátttakendur í mótinu komu frá háskólum í öllum norrænu ríkjunum fimm auk Eistlands og Litháen og fór keppnin fram á sama tíma í löndunum sjö.

Í keppninni hafði hvert lið yfir einni tölvu að ráða og átti að leysa ellefu stærðfræðilegar og tölvunarfræðilegar þrautir eða dæmi á fimm klukkustundum. Alls tóku yfir 200 lið þátt í keppninni að þessu sinni en hluti þeirra taldist ekki til löglegra þátttakenda þar sem liðsmenn voru of gamlir eða of langt komnir í námi. Árangur liðanna var metinn út frá þeim fjölda þrauta sem þau leystu og þeim tíma sem fór í hverja lausn. 

Þeim Arnari, Kára og Bjarka tókst að leysa sex þrautanna og það skilaði þeim í 16. sæti í keppni löglegra liða og reyndist það langefst íslenskra liða. Liðið Balloon Animals frá Kaupmannahafnarháskóla varð hins vegar hlutskarpast í keppninni en það lauk öllum ellefu þrautunum. Það telst því Norðurlandameistari háskólaliða í forritun. 

Sigurvegurum í hverju landi gefst kostur á að taka þátt í forritunarkeppni háskóla í Norðvestur-Evrópu (North Western European Programming Contest). Sú keppni fer að þessu sinni fram í Delft Hollandi í lok nóvember. Þangað stefna þeir Arnar, Kári og Bjarki ótrauðir en mótið er forkeppni fyrir sjálft heimsmeistaramót háskólanna í forritun.

Háskóli Íslands óskar þeim Arnari, Kára og Bjarka innilega til hamingju með glæsilegan árangur.