Kennarar í íslensku og íslensku sem öðru máli flytja í Eddu – hús íslenskunnar
![Kennarar í íslensku og íslensku sem öðru máli flytja í Eddu – hús íslenskunnar - á vefsíðu Háskóla Íslands](https://www.hi.is/sites/default/files/styles/efsta_mynd___fr_ttum/public/ghg/kri_edda_vigsluhatid_230419_001_2_0.jpg?itok=OJg3emur)
Á liðnum dögum hafa kennarar í íslensku og íslensku sem öðru máli verið að flytja vinnuaðstöðu sína yfir í Eddu – hús íslenskunnar. Um er að ræða tæplega 40 málfræðinga og bókmenntafræðinga sem eru með aðstöðu á 3. hæð nýja hússins. Fyrr í sumar fluttu starfsmenn Árnastofnunar í Eddu og er hún orðin lifandi vinnustaður stórs hóps fræðafólks á sviði íslensks máls, bókmennta og menningar.
Í september verða tekin í notkun vinnurými á 3. hæð fyrir doktorsnema, nýdoktora og emeritusa og í kjölfarið aðstaða á 2. hæðinni fyrir nemendur í grunn- og meistaranámi. Þar eru enn fremur fimm kennslustofur sem nýttar verða af Háskóla Íslands frá og með næstu áramótum.
Um mitt ár 2024 verður opnuð á jarðhæðinni ný handritasýning Árnastofnunar sem mun væntanlega draga til sín þúsundir gesta árlega.