Katrín tekur við sem stjórnarformaður Fasteigna HÍ

Katrín Jakobsdóttir, meðlimur í háskólaráði Háskóla Íslands og fyrrverandi forsætisráðherra, hefur tekið við sem formaður stjórnar Fasteigna Háskóla Íslands, félags sem heldur utan um þær fasteignir sem nýttar eru í þágu skólans.

Háskólaráð samþykkti á síðasta fundi sínum að Katrín tæki við stjórnarformennsku af Daða Má Kristóferssyni, prófessor við Hagfræðideild, sem horfið hefur til starfa í ríksstjórn Íslands sem fjármála- og efnahagsráðherra.

Fasteignafélag HÍ var sett á laggirnar árið 2021 með samningi milli skólans og stjórnvalda og um leið voru fasteignir skólans færðar inn í félagið. Hlutverk þess er að leigja aðstöðu undir starfsemi HÍ, það er kennslu, vísindarannsóknir og nýsköpun og hvers konar ráðstefnur, fundi og samkomur. Með stofnun félagsins voru uppfyllt þau grunnsjónarmið sem koma fram í lögum um opinber fjármál um sérhæfða eignaumsýslu og fjárhagslegt gagnsæi við húsnæðisrekstur á vegum ríkisins.

Fasteignir Háskóla Íslands telja nokkra tugi bygginga sem samanlagt eru um 100 þúsund fermetrar að stærð. Til viðbótar leigir HÍ húsnæði undir starfsemi sína. 

„Mér er sýnt mikið traust með þessu verkefni en Fasteignir HÍ er félag í mótun sem hefur gríðarlega mikilvægu hlutverki að gegna við framtíðaruppbyggingu á háskólasvæðinu. Ég hlakka til að takast á við þetta nýja verkefni,“ segir Katrín Jakobsdóttir.

Auk Katrínar sitja þau Guðmundur R. Jónsson, Hrafn Hlynsson, Íris Huld Christersdóttir og Silja Bára Ómarsdóttir í stjórn Fasteignafélags Háskóla Íslands. Varamenn eru Guðmundur Axel Hansen og Katrín Atladóttir.