Fengu styrk úr Nehru-Grimsson sjóðnum til rannsóknardvalar á Íslandi

Tveir ungir vísindamenn frá Indlandi hafa á vormisseri dvalið við nám í jöklavísindum við Háskóla Íslands með stuðningi Nehru-Grimsson sjóðsins. 

Þau tóku á dögunum við skjali til staðfestingar á rannsóknardvöl sinni á Íslandi úr hendi Ólafs Ragnars Grímssonar, fyrrverandi forseta Íslands, sem setti sjóðinn á fót í kjölfar þess að stjórnvöld á Indlandi veittu honum hinn þekktu Nehru-verðlaun. Nehru verðlaunin eru kennd við fyrsta forsætisráðherra Indlands, Jawaharlal Nehru, og eru helguð hugsjóninni um alþjóðlega samkennd og samvinnu. 

Nehru-Grimsson sjóðurinn gerir nemendum og ungu vísinda fólki frá Indlandi kleift að dvelja á Íslandi um hálfs árs skeið og sækja nám við Háskóla Íslands og taka þátt í rannsóknar ferðum á íslenska jökla. Á liðnum árum hefur sjóðurinn gert á annan tug nemenda kleift að sækja nám og þjálfun á Íslandi og einnig gert íslenskum jöklafræðingum kleift að fara til Indlands til kennslu.

Styrkþegarnir í ár eru Nidhiya Jose, sem leggur stund á doktorsnám við Indian Institute of Science í Bangalore, og Girjesh Dasaundhi, sem leggur stund á doktorsnám við Indian Institute of Technology í Mumbai. Sem Nehru-Grimsson rannsóknarfélagar sóttu þau m.a. námskeið í almennri jarðefnafræði, fjarkönnun, jöklafræði og jöklajarðfræði og tóku þátt í þremur rannsóknarleiðangrum á jökla.

Nidhiya Jose vinnur að verkefni um líkanagerð sem tengist forsögulegri stærð og umfangi jökla í Himalajafjöllunum og notar til þess m.a. aðferðir tímatalsfræði jarðar, fjarkönnunar og talnalíkön.

Girjesh Dasaundhi sérhæfir sig í hreyfifræði jökla sem skríða hratt fram og nýtir til þess gögn og aðferðir fjarkönnunar.