Menntun án aðgreiningar, MT

–

Námið er ætlað kennurum í leik- og grunnskólum sem vilja styrkja sig sem fagmenn í skóla án aðgreiningar í fjölmenningarsamfélagi. Með sérhæfingunni er komið til móts við brýna þörf fyrir framhaldsmenntun kennara sem starfa í breyttu umhverfi. Jafnframt er brugðist við hraðri fjölgun nemenda með annað móðurmál en íslensku í leik- og grunnskólum.

MT námið felur í sér að nemendur geta tekið fleiri námskeið í stað 30 eininga lokaritgerðar.

Sækja um nám

Um hvað snýst námið?

MT nám í menntun án aðgreiningar er fyrir kennara sem nú þegar hafa leyfisbrét til kennslu.

Í náminu er sjónum einkum beint að því hvernig skólastarfið getur búið nemendum með ólíkar forsendur til náms aðstæður til að þroskast og læra í samfélagi við aðra nemendur og kennara sína.

Nemendur fá stuðning við að þróa starfskenningu sem byggir á kenningum og hugmyndum um nám án aðgreiningar. Stefnt er að því að þátttakendur öðlist hæfni í að skapa menningu í skólastarfi þar sem styrkleikar bæði nemenda og kennara fá að njóta sín, með manngildi, lýðræði og félagslegt réttlæti að leiðarljósi.

Nemendur í MT námi skrifa ekki 30 eininga rannsóknarritgerð heldur taka fleiri kennslufræðitengd námskeði í staðinn.

Uppbygging náms

Námið er 120 einingar og er skipulagt sem fullt nám til tveggja ára eða hlutanám í þrjú til fjögur ár.

Námið skiptist í:

Skyldunámskeið, 30 einingar
Bundið val, 35 einingar
Valnámskeið, 55 einingar

Fyrirkomulag kennslu

Kennsla og próf fara fram á íslensku.

Flest námskeið eru kennd í fjarnámi í rauntíma og eru með mætingarskyldu. Þó getur verið mismunur á fyrirkomulagi á milli námskeiða og skulu nemendur kynna sér það vel.

Meginmarkmið

Markmið með náminu er að kennarar geti styrkt sig sem fagmanneskjur í kennslu í skóla án aðgreiningar í fjölmenningarsamfélagi með manngildi, lýðræði og félagslegt réttlæti að leiðarljósi.

Annað

Við brautskráningu úr kennaranámi við íslenska háskóla skal kennari búa yfir hæfni í íslensku sem samsvarar að lágmarki C1 í Evrópska tungumálarammanum.

Hér má sjá Tungumálaramma Evrópuráðsins.

Námið getur veitt aðgang að frekara framhaldsnámi á stigi 2.2 - meistaranámi. Námið veitir ekki aðgang að doktorsnámi.