Starfsþjálfun hjá alþjóðastofnun og tækifæri til að kynnast heimi hugverkaréttinda

Hefur þú áhuga á að fara í launaða starfsþjálfun hjá alþjóðastofnun?

Háskóli Íslands í samstarfi við Evrópsku einkaleyfastofuna (EPO) og Hugverkastofu Evrópusambandsins (EUIPO) auglýsir eftir umsóknum frá nemendum skólans í launaða starfsþjálfun. Starfsþjálfunin er í 12 mánuði frá miðjum september ár hvert. Starfsþjálfunin er auglýst á Tengslatorgi og hægt er að sækja um þar og í tölvupósti til inno@hi.is (sjá upplýsingar um umsókn hér fyrir neðan). Frestur til að sækja um starfsþjálfun til Háskóla Íslands vegna tímabilsins 2024-2025 er til og með 16. febrúar 2024.

Kynningarmyndbönd um starfsþjálfunina má finna á heimasíðum EPO og EUIPO

Nánari upplýsingar veitir Oddur Sturluson, verkefnisstjóri á Vísinda- og Nýsköpunarsviði: oddstu@hi.is.

Pan-European Seal samstarfið

Háskóli Íslands er aðili að Pan-European Seal áætlun Evrópsku einkaleyfastofunnar (EPO) og Hugverkastofu Evrópusambandsins (EUIPO). Markmið áætlunarinnar er að auka þekkingu á hugverkaréttindum meðal nemenda og starfsfólks háskóla í Evrópu og brúa þannig bilið á milli háskóla og atvinnulífsins þegar kemur að hagnýtingu og verndun hugverka. Samstarfið felur m.a. í sér að aðgang að kennsluefni og annars konar stuðning við kennslu og skipulagningu viðburða tengdum hugverkaréttindum. Hugverkastofan átti milligöngu um samstarf stofnananna við Háskóla Íslands um aðild að Pan-European Seal áætluninni.

Launuð starfsþjálfun
Hjá EPO og EUIPO öðlast nemendur einstaka starfsreynslu hjá alþjóðastofnunum og alhliða fræðslu á hugverkaréttindum. Auk þess fylgja starfsþjálfuninni ýmiss konar fríðindi eins og tungumálanám. Þeir nemendur sem hafa áhuga á að sækja um starfsþjálfunina sækja fyrst um til Háskóla Íslands sem metur hvort viðkomandi uppfylli grunnskilyrði og útnefnir svo tiltekinn fjölda nemenda.

Nemendur sem stunda nám á þeim sviðum sem sterkasta tengingu hafa við hugverkaréttindi eru sérstaklega hvattir til að sækja um (verkfræði, raunvísindi, lyfjafræði, líftækni, viðskiptafræði, lögfræði, hagfræði, fjármál og alþjóðasamskipti). Þegar Háskólinn hefur metið umsóknir og tekið ákvörðun um hvaða nemendur verða útnefndir geta þeir nemendur sótt um hjá EPO eða EUIPO sem svo taka endanlega ákvörðun um hvaða umsækjendur eru valdir til starfsþjálfunarinnar.

Hver getur sótt um?

Nemendur Háskóla Íslands sem hafa:
a) lokið grunn- eða meistaranámi innan tveggja ára frá dagsetningu umsóknar, eða eru skráðir í doktorsnám. Þau sem valin eru til starfsþjálfunarinnar þurfa að hafa lokið námi sínu við upphaf hennar (það á líka við um skil á lokaritgerðum).

b) góða þekkingu á einu af þremur vinnutungumálum EPO (ensku, þýsku eða frönsku), að lágmarki stigi B1 samkvæmt sameiginlegum evrópskum viðmiðunarramma fyrir tungumál (Common European Framework of Reference for languages).

Það felur í sér að geta skilið mælt mál um kunnugleg málefni tengd vinnu, námi og áhugamálum. Það felur einnig í sér að geta skilið aðalatriði frétta í útvarpi og sjónvarpi eða umfjöllun um málefni líðandi stundar sem fjallað er um af skýrmæltu fólki. Nánari upplýsingar um evrópska viðmiðunarrammann fyrir tungumál er að finna hér: Common European Framework of Reference for languages.

Sé sótt um hjá EUIPO gildir það sama nema að þar eru vinnutungumálin fimm (enska, þýska, franska, ítalska eða spænska).

c) lokið þeim rafrænu námskeiðum sem farið er fram á.

Sé sótt um starfsnám hjá EPO þarf að ljúka námskeiðum fyrir upphaf starfsnáms.

Sé sótt um hjá EUIPO þarf að ljúka námskeiðum fyrir skil umsóknar til þeirra.

Frekari upplýsingar um rafrænu námskeiðin er að finna undir upplýsingum um umsóknir til hvorrar stofnunarinnar fyrir sig hér fyrir neðan.

Athugið að ekki er hægt að sækja um hjá bæði EPO og EUIPO.

Tímalína umsóknarferlis

Umsóknarfrestur til Háskóla Íslands: 16. febrúar
Umsóknarfrestur til EPO: 15. mars
Umsóknarfrestur til EUIPO: 31. mars
Umsóknum svarað: Júní
Starfsþjálfun hefst: September

Umsókn til Háskóla Íslands

Allir umsækjendur þurfa fyrst að sækja um til Háskóla Íslands sem svo tekur ákvörðun um útnefningu. Þau sem eru útnefnd þurfa svo að sækja um rafrænt á vefsíðu viðkomandi stofnunar.

Starfsþjálfun hjá EPO: Háskóli Íslands mun útnefna allt að fimm nemendur sem lokið hafa grunn- eða meistaranámi, eða eru í doktorsnámi í verkfræði, raunvísindum, lyfjafræði eða líftækni og fimm nemendur í viðskiptafræði, lögfræði, hagfræði, fjármálum eða alþjóðasamskiptum, sem fá tækifæri til að senda inn umsókn um starfsþjálfun til EPO.

Svið starfsþjálfunar hjá EPO:

Vísindi, verkfræði og upplýsingatækni
Mannauðsstjórnun og viðskiptafræði
Alþjóðasamskipti og samskipti
Hagfræði og fjármál
Lögfræði

Starfsþjálfun hjá EUIPO: Háskólinn mun einnig útnefna fimm nemendur sem lokið hafa námi í lögfræði, hugverkarétti, þekkingarstjórnun, stjórnmálafræði, alþjóðasamskiptum, málvísindum, hagfræði, viðskiptafræði, frumkvöðlafræði, upplýsingatækni (gagnagreining, upplýsingaöryggi, viðskiptagreining, hugbúnaðarverkfræði, þjónustulausnir), samskiptum, aðstöðustjórnun (t.d. verkfræði), og mannauðsstjórnun, sem fá tækifæri til að senda inn umsókn um starfsþjálfun til EUIPO.

EPO og EUIPO taka ákvörðun um hvaða nemendum verður boðin starfsþjálfun.

Í umsókn til Háskóla Íslands (send í tölvupósti á inno@hi.is) skal koma fram:

Nafn
Netfang og símanúmer
Upplýsingar um hvaða nám viðkomandi er að stunda og hvar í námsferli viðkomandi er
Starfsferilskrá (CV) - uppfærð og nota skal EUROPASS – CV sniðmátið, word útgáfu.
Kynningarbréf þar sem kemur fram af hverju sótt er um og hvort óskað sé eftir starfsþjálfun hjá EPO eða EUIPO og á hvaða sviði (ekki er heimilt að sækja um hjá báðum stofnunum). Bréfið skal ritað á þann hátt að það staðfesti getu umsækjanda til að skrifa nægilega góða ensku til að uppfylla stig B1, samkvæmt sameiginlegum evrópskum viðmiðunarramma fyrir tungumál (Common European Framework of Reference for languages).
Námsferilsyfirlit og/eða prófskírteini, staðfest afrit.

Athugið að allar upplýsingar í umsóknum, og gögn sem þeim fylgja, þurfa að vera á ensku.

Frestur til að sækja um starfsþjálfun til Háskóla Íslands er 16. febrúar 2024.

Umsækjendur fá að vita nokkrum dögum síðar hvort Háskóli Íslands hyggst útnefna þau. Þau sem útnefnd eru geta í kjölfarið lagt inn formlega rafræna umsókn til EPO eða EUIPO. Háskóli Íslands sendir stofnununum lista yfir útnefnda nemendur fyrir 29. febrúar.

Nemendur eru hvattir til að kynna sér möguleika á að sækja um Erasmus+ styrk vegna ferðakostnaðar og uppihalds.

Umsókn til EPO

Athugið að sækja þarf fyrst um til Háskóla Íslands (sjá að ofan) og aðeins þau sem eru útnefnd af HÍ geta sótt um starfsnámið. Þau sem eru útnefnd þurfa svo að sækja um rafrænt á vefsíðu viðkomandi stofnunar.

EPO er önnur stærsta stofnun Evrópu með rúmlega 7 þúsund starfsmenn frá fleiri en 30 löndum. Höfuðstöðvar EPO eru í München en stofnunin er einnig með skrifstofur í Haag, Berlín, Vínarborg og Brussel. Viðfangsefni EPO snúast fyrst og fremst um einkaleyfi.

Starfsþjálfunin er í 12 mánuði frá miðjum september ár hvert og fer hún fram í Munchen. Fyrir hana eru greiddar 2000 Evrur á mánuði (það er á ábyrgð starfsmanns að telja fram tekjur til skatts í sínu heimalandi. Tekjur eru taldar fram sem erlendar tekjur (liður 2.8 á tekjusíðu framtals) og skattur er gerður upp í álagningu). Ef viðkomandi þiggur annan fjárstuðning meðan á starfsþjálfun stendur þarf að láta vita af því. Hægt er að óska eftir eingreiðslu vegna flutninga að upphæð 250 Evrur hvora leið við upphaf og lok starfsþjálfunartímabils.

Lokað er fyrir umsóknir um starfsþjálfun til EPO á tímabilinu 15. febrúar til 15. mars 2024

Hér er hlekkur á upplýsingasíðu EPO um starfsþjálfunina: Pan-European Seal Professional Traineeship Programme - EPO

Umsókn til EPO þurfa að fylgja sömu fylgigögn og send voru með umsókn til HÍ. Þó að ekki sé farið formlega fram á staðfestingu á tungumálakunnáttu myndi það styrkja umsókn að senda slíka með og sama gildir um meðmæli frá kennara eða fyrrverandi vinnuveitanda á tengdu sviði.

Though not mandatory, it could strengthen applications to include a formal confirmation of language skills from a learning institution as well as a letter of recommendation from a teacher or former employer in the relevant field.

Útnefndir umsækjendur þurfa að ljúka eftirfarandi rafrænum námskeiðum á vegum the European Patent Academy áður en starfsþjálfun hefst:

Introduction to the European patent system (skilyrði fyrir alla)
Using CPC (skilyrði fyrir nemendur í verkfræði og raunvísindum)
The EPO as PCT authority (skilyrði fyrir alla sem ekki hafa bakgrunn í verkfræði)

Umsókn til EUIPO

Athugið að sækja þarf fyrst um til Háskóla Íslands (sjá að ofan) og aðeins þau sem eru útnefnd af HÍ geta sótt um starfsnámið.

EUIPO er stærsta sjálfstæða undirstofnun Evrópusambandsins með um 1.200 starfsmenn og aðsetur í Alicante. Viðfangsefni EUIPO eru hvers kyns hugverkavernd.
Starfsþjálfunin er í 12 mánuði frá miðjum september ár hvert og fer hún fram í Alicante. Fyrir hana eru greiddar 1200 Evrur á mánuði (það er á ábyrgð starfsmanns að telja fram tekjur til skatts í sínu heimalandi. Tekjur eru taldar fram sem erlendar tekjur (liður 2.8 á tekjusíðu framtals) og skattur er gerður upp í álagningu).

Lokað er fyrir umsóknir um starfsþjálfun til EUIPO á tímabilinu 1. mars til 31. mars 2024

Umsókn til EUIPO þurfa að fylgja sömu fylgigögn og send voru með umsókn til HÍ, auk staðfestingar á að öðru þessara rafrænu námskeiða hafi verið lokið:

EUTM in a Nutshell
RCD in a Nutshell

Hér er að finna frekari upplýsingar um rafrænu námskeiðin:
Learning Plan: EUTM and RCD Learning Plan for University Students

Þó að ekki sé farið formlega fram á staðfestingu á tungumálakunnáttu myndi það styrkja umsókn að senda slíka með og sama gildir um meðmæli frá kennara eða fyrrverandi vinnuveitanda á tengdu sviði.

Þegar um er að ræða umsókn um starfsþjálfun hjá EUIPO, má nemandi ekki hafa notið góðs af eða vera njóta góðs af hvers konar starfsnámi (launuðu eða ólaunuðu) hjá evrópskri stofnun. Hann má ekki heldur hafa verið eða vera aðstoðarmaður þingmanns, samningsráðgjafa eða intra-muros rannsakanda, eða tímabundinn eða ráðinn fulltrúi, aðstoðarmaður eða starfsmaður hjá evrópskri stofnun.

Fræðsluefni um hugverkaréttindi

Mikið magn fræðsluefnis um hugverkaréttindi er í boði fyrir nemendur og starfsfólk samstarfsskólanna. Efnið spannar allt frá einstaka fræðsluviðburðum til heilla námskeiða sem lýkur með viðurkenningum.

Stuttmynd um hugverkaréttindi - The IP Link

e-learning centre of the European Patent Academy

Introduction to the European patent system

Using CPC

The EPO as PCT authority

EUTM and RCD Learning Plan for University Students

"Fyrir ári síðan var mér bent á það tækifæri að sækja um starfsþjálfun hjá EPO, eða Einkaleyfistofu Evrópu. Eftir að hafa kynnt mér EPO, fannst mér tilhugsunin um að fá tækifæri til að kynnast alþjóðlegri stofnun af þessari stærðargráðu afar spennandi og var viss um að ég myndi læra mikið á dvöl þar. Með starfsþjálfuninni sá ég fram á að öðlast starfsreynslu á því sviði sem ég stundaði nám við hjá HÍ og fá að vinna með færum og reynslumiklum einstaklingum innan þeirra sviðs. Hingað til hefur starfsþjálfunin staðist allar væntingar, og þó svo að Covid hafi litað ferlið aðeins seinustu tvo mánuði, þá hefur stofnunin verið sveigjanleg og fundið góðar lausnir á hlutunum. Eins og ég nefndi þá hefur starfsþjálfunin staðið fyrir sínu og ekki síst Munchen sjálf sem mér hefur fundist virkilega skemmtileg borg. Fólk frá hinum ýmsu Evrópulöndum eru taka þátt í þessu prógrammi og eru dugleg að skipuleggja ferðalög og viðburði. Ég mæli því heilshugar með að fólk láti vaða og sækja um því það hefur verið virkilega skemmtilegt og gefandi að kynnast því hvernig svona stór alþjóðleg stofnun starfar".

Hinrik Atli Smárason