Horizon 2020

Horizon 2020 - Rammaáætlun ESB fyrir rannsóknir og nýsköpun 2014-2020

Markmið Horizon 2020 er að auka samkeppnishæfni Evrópu, skapa störf og stuðla að því að fleiri góðar hugmyndir komist á markað. Horizon 2020 endurspeglar grundvallarmarkmið Evrópu 2020 áætlunar ESB um að styðja sjálfbæran hagvöxt í Evrópu. Áætlunin verður máttarstólpi nýsköpunarsambandsins (e. Innovation Union) sem er eitt af sjö flaggskipum ESB.

Áætlunin sameinar undir einum hatti 7. rannsóknaáætlun ESB, nýsköpunarhluta samkeppnisáætlunar ESB (CIP) auk þess að fjármagna Evrópsku nýsköpunar- og tæknistofnunina (EIT). Framkvæmdastjórnin hefur lagt til að 80 milljörðum evra verði varið til áætlunarinnar sem er um 46% aukning frá fyrri áætlunum (7 RÁ og CIP).

Horizon 2020 skiptist í þrjár meginstoðir

1. Öndvegisrannsóknir (e. Excellence Science)

Markmiðið er að stuðla að framúrskarandi rannsóknum í Evrópu með því að styðja bestu hugmyndirnar, veita evrópskum vísindamönnum tækifæri til að þróa hæfileika sína, byggja upp og styrkja rannsóknarinnviði á heimsmælikvarða og auka aðdráttarafl Evrópu sem valkost alþjóðlegra vísindamanna.

Öndvegisrannsóknir skiptist í eftirtaldar áætlanir:

Styrki á vegum Evrópska rannsóknaráðsins (ERC) - 13.1 milljarðar evra
Stuðning við framtíðartækni - 2.7 milljarðar evra
Styrki til þjálfunar, starfsþróunar og hreyfanleika ungs vísindafólks (Marie Sklodowska Curie styrkir) - 6.2 milljarðar evra
Stuðning við rannsóknarinnviði í Evrópu - 2.5 milljarðar evra

2. Forystu í atvinnulífi (e. Industrial Leadership)

Markmiðið er að efla markaðsdrifnar rannsóknir og nýsköpun. Í þeim tilgangi skal stefnt að því að hraða tækniþróun til uppbyggingar framtíðarfyrirtækja, stuðla að frekari fjárfestingum í rannsóknum og nýsköpun og aðstoða lítil og meðalstór fyrirtæki við að verða leiðandi á alþjóðamarkaði.

Forysta í atvinnulífi skiptist í:

Forysta í tækniþróun. - 13.55 milljarðar evra
Nýsköpun í litlum og meðalstórum fyrirtækjum - 0.6 milljarðar evra
Aðgangur að áhættufjármagni - 2.8 milljarðar evra

3. Samfélagsáskoranir (e. Societal Challanges)

Innan samfélagsáskorana eru sjö undiráætlanir sem munu styrkja rannsóknir með það að markmiði að auka þekkingu á mismunandi sviðum vísinda. Áhersla verður lögð á að koma niðurstöðum rannsókna á markað með stuðningi við tilraunaverkefni, opinber innkaup og markaðssetningu nýsköpunar.

Samfélagsáskoranir skiptast í eftirtalin svið:

Heilbrigði og lýðheilsa - 7.5 milljarðar evra
Fæðuöryggi, sjálfbær landbúnaður, sjávarrannsóknir og líftækni - 3.85 milljarðar evra
Orka - 5.9 milljarðar evra
Samgöngur - 6.3 milljarðar evra
Loftlagsmál, auðlindir og hráefni - 3.1 milljarðar evra
Evrópa í síbreytilegum heimi - innifelandi, skapandi, og hugsandi samfélög - 1.3 milljarðar evra
Örugg samfélög - til verndar frelsis og öryggis Evrópu - 1.7 milljarðar evra

Að auki mun Horizon 2020 fjármagna Evrópsku nýsköpunar- og tæknistofnunina (EIT) og Sameiginlegu rannsóknamiðstöðina (e. Joint Research Centre, JRC).

EIT, sem stofnuð var árið 2008, mun gegna lykilhlutverki við að leiða saman háskóla í fremstu röð, rannsóknastofnanir og atvinnulíf í þekkingarþríhyrning á heimsmælikvarða og mennta frumkvöðla.

EIT hefur þegar sett upp þrjá s.k. þekkingar- og nýsköpunarklasa (KIC) um:

loftlagsbreytingar
sjálfbæra orkuframleiðslu
upplýsingatækni

og stefnt er að því að setja upp sex til viðbótar á tímabilinu 2014-2020. Enn sem komið er hafa klasarnir einungis ensk heiti:

Healthy Living
Raw Materials
Food for the Future
Urban Mobility
Added Value Manufacturing
Smart Secure Societies

JRC, mun vera hluti af Horizon 2020 og er ætlað að styðja við stefnumótun ESB á sviði rannsókna og nýsköpunar.

Helstu nýjungar

Áætluninni er ætlað að verða einfaldari og aðgengilegri en núverandi áætlanir og styðjast við eitt samræmt en þó sveigjanlegt regluverk. Hægt verður að sækja um stuðning fyrir hvert stig í nýsköpunarferlinu allt frá grunnrannsóknum til markaðssetningar. Gert er ráð fyrir að umsækjendur geti fengið allar upplýsingar og aðstoð á einum stað. Stefnt er að færri úttektum og að styrkumsóknir verði afgreiddar innan 100 daga frá umsókn.

Horizon 2020 er opin fyrir þátttöku aðildarríkjanna 28, umsóknarríkja, samstarfsríkja þ.m.t. Íslands, Noregs og Liechtenstein, auk þriðju ríkja.

Nánari upplýsingar eru á vef Horizon 2020.

Gagnlegir tenglar

Spurningar og svör um Marie Sklodowska-Curie áætlunina

Möguleikar fyrir Hag-, hug-, og félagsvísindi í öðrum áætlunum Horizon 2020

Upplýsingatækni í öðrum áætlunum Horizon 2020