Vel sótt ráðstefna um fjöltyngdar fjölskyldur og skólastarf

Ráðstefnan Fjöltyngdar fjölskyldur og skólastarf fór fram 21. september á Grand Hotel Reykjavík. Rannsóknarhópur um tungumálastefnu og starfshætti fjölskyldna innflytjenda á Íslandi og áhrif þeirra á menntun stóð fyrir ráðstefnunni ásamt Deild kennslu- og menntunarfræði við HÍ. 
Rannsóknarhópurinn stýrir stórri rannsókn hér á landi sem styrkt er af RANNÍS og var hún kynnt á ráðstefnunni. 
„Fyrstu niðurstöður rannsóknarinnar benda til þess að fjölskyldurnar hafi fjölbreyttar tungumálastefnur og noti ýmsar aðferðir til að styðja við og kenna börnum sínum móðurmálin,“ sagði Hanna Ragnarsdóttir, prófessor í fjölmenningarfræðum við Menntavísindasvið HÍ sem fer fyrir rannsóknarhópnum. 

„Börnin taka virkan þátt í að þróa tungumálastefnur fjölskyldnanna með því m.a. að velja sér tungumál til notkunar í mismunandi samhengi. Nokkur munur er milli lítilla og stærri tungumálahópa þegar kemur að aðgengi að efni og stuðningi við móðurmálin. Einnig er munur á aðgengi að stuðningi í minni sveitarfélögum annars vegar og þeim stærri hins vegar. Niðurstöður benda jafnframt til þess að töluverður munur sé á samstarfi heimila og skóla í einstökum skólum í rannsókninni.”

Tungumálastefna, fjöltyngi og skólastarf var í brennidepli á ráðstefnunni og fyrirlesarar komu frá Svíþjóð, Belgíu, Krít, Noregi, Bretlandi og Kanada og fjölluðu m.a. um móttökudeildir, skólaþróun og menntastefnu, rannsóknir og þróunarverkefni í samstarfi við leik- og grunnskóla, tungumálastefnu, tengsl kennara og foreldra og sjálfsmyndir barna sem alast upp við mörg tungumál. Meðal fyrirlesara var Jim Cummins en hann er vel þekktur fræðimaður og frumkvöðull á þessu sviði. Erindi hans nefndist Multilingual development and literacy socialization: Creating a foundation for educational success in the preschool and primary school years.  
Ráðstefnan var vel sótt af kennurum, stjórnendum á öllum skólastigum, fræðafólki og stefnumótunaraðilum. Um 150 þátttakendur voru í salnum og og  hátt í 100 í streymi.

„Sjónarhorn fyrirlesaranna voru svo ólík, sum komu beint inn á útfærslu stefnumótunar í raun, ræddu kennsluaðferðir, vaxandi hæfni kennara og mikilvægar jákvæðar viðhorfsbreytingar í samfélaginu. En einnig var rætt um togstreitu og einn tók dæmi um harðari stefnu gegn fjöltyngi frá ráðherra í sínu heimalandi. Fyrir okkur sem erum að efla nám og byggja upp námsbraut í Menntun allra var ráðstefnan hafsjór á fróðleik og ég veit að fleiri þátttakendur taka undir það,” sagði,“ segir Kristín Jónsdóttir, forseti Deildar kennslu- og menntunarfræði við HÍ. 

Myndir: Gunnar Sverrisson.