Textíl- og hönnunarsýning nemenda á Menntavísindasviði

Textílverkefni eru unnin í tveimur meistaranámskeiðum í Textíl og hönnun í Deild faggreinakennslu Menntavísindasviðs Háskóla Íslands. Námskeiðin heita; Textíllist, tíska og hönnun í sögulegu samhengi og Skapandi endurnýting textíla. Ásdís Jóelsdóttir, lektor á Menntavísindasviði kennir námskeiðin og heldur utan hönnunar- og textílnám við Faggreinadeild.

„Um tuttugu textílkennaranemar tóku þátt í ár. Í öllum verkefnum er verið að vinna með endurnýtingu, hönnun og nýsköpun á mismunandi vegu á áherslum. Nemarnir hönnuðu búninga út frá eigin sögusviði, en textílkennarar taka gjarnan þátt í að kenna og aðstoða grunnskólanemendur í slíkum verkefnum, t.d. fyrir söngleiki eða Stílkeppni grunnskólanna. Einnig geta búningar verið hluti af verkefnavali í textíl. Í myndverkunum er lögð áhersla á að vinna með blandaða tækni með listrænum áherslum og fyrirmynd út frá auga drónans. Í textílkennslu er æ meiri áhersla á að vinna með blöndun aðferða sem gefa meiri áferð, fjölbreytni og dýpt í verkin. Textílgreinin býr yfir fjölbreyttum aðferðum og verkefnavali auk endurnýtingar með óráðnu efnisvali, litum og mynstrum í nær óendanlegum lausnum. Þannig verður til eitthvað nýtt og spennandi þar sem hver og einn fær ráðið för og útkomu eftir eigin áhuga og krafti,“ segir Ásdís.

Verkin voru til sýnis í afmarkaðan tíma í Skipholti þar sem kennsla list- og verkgreina fer fram en hér ber að líta brot af fjölmörgum verkum nemenda sem voru til sýnis.

Myndir: Kristinn Ingvarsson