Nýr skrifstofustjóri Miðstöðvar framhaldsnáms

Eiríkur Stephensen hefur verið ráðinn skrifstofustjóri Miðstöðvar framhaldsnáms við Háskóla Íslands frá og með 1. desember 2015.

Eiríkur lauk BS-prófi í líffræði frá Háskóla Íslands árið 1992 og starfaði á lífefnafræðistofu Raunvísindastofnunar til 1995. Hann lauk doktorsprófi í dýralífeðlisfræði með áherslu á eiturefnavistfræði frá Gautaborgarháskóla 2003. Eiríkur starfaði hjá Lyfjaþróun frá 2003-2008 og á Raunvísindastofnun frá 2008 þar til hann hóf störf hjá Rannís árið 2010 sem sérfræðingur á Rannsókna- og nýsköpunarsviði. Hann var ritari stjórnar Rannsóknasjóðs og Innviðasjóðs frá 2012-2015. Eiríkur hefur setið fyrir Íslands hönd í stjórnum og ráðum ýmissa verkefna er varða stefnumótun og fjármögnun vísindastarfs á norrænum og evrópskum vettvangi. 

Miðstöð framhaldsnáms tók til starfa 1. febrúar 2009. Hlutverk hennar er að tryggja og efla gæði meistara- og doktorsnáms við Háskóla Íslands og stuðla að viðgangi þess í samræmi við ákvarðanir háskólaráðs. Miðstöð framhaldsnáms hefur heildaryfirsýn yfir framhaldsnámið og starfar náið með háskóladeildum, gæðanefnd háskólaráðs og sameiginlegri stjórnsýslu.