Haruki Murakami sæmdur heiðursdoktorsnafnbót við Háskóla Íslands

Japanski rithöfundurinn Haruki Murakami var nýverið sæmdur heiðursdoktorsnafnbót í japönskum bókmenntum við Mála- og menningardeild Háskóla Íslands. Murakami, sem er fæddur árið 1949, er þekktur um allan heim fyrir skrif sín og er án efa einn víðlesnasti rithöfundur Japans fyrr og síðar.

Murakami hefur sent frá sér fjölda verka frá því að fyrsta skáldsaga hans kom út árið 1979 og hafa þau vakið heimsathygli. Bækur hans hafa verið þýddar á rúmlega 50 tungumál, m.a. sex þeirra á íslensku. Kristján Hrafn Guðmundsson þýddi Það sem ég tala um þegar ég tala um hlaup (2016), Ingunn Snædal þýddi skáldsöguna Hinn litlausi Tsukuru Tazaki og pílagrímsár hans (2014) og Uggi Jónsson þýddi skáldsögurnar Sunnan við mærin, vestur af sól (2001), Spútnik-Ástin (2003), Norwegian wood (2006) og smásagnasafnið Eftir skjálftann (2004). Nýjasta skáldsaga Murakami kom út í Japan árið 2023.

Í rökstuðningi Mála- og menningardeildar er gerð grein fyrir hinu þýðingarmikla framlagi  Murakami á sviði bókmennta, en hann er  einn áhrifamesti rithöfundur sinnar kynslóðar í heiminum ásamt því að vera afkastamikill þýðandi. Skáldverk, ritgerðir og þýðingar Murakami hafi þannig vakið verðskuldaða athygli víða um heim. Verk hans hafa hlotið lof hér á landi og auðgað íslenskt samfélag.

Haustið 2003 var Murakami gestur á Bókmenntahátíðinni í Reykjavík, þar sem hann fjallaði um verk sín við gríðarlega góðar undirtektir. Í tengslum við heimsóknina hélt hann einnig fjölsóttan opinn fyrirlestur í Hátíðasal Háskóla Íslands á vegum Bókmenntahátíðar og Stofnunar Vigdísar Finnbogadóttur í erlendum tungumálum. Komust þar færri að en vildu. Murakami hefur síðan fjallað um Íslandsheimsóknina í skrifum sínum. Sama haust hóf Háskóli Íslands einnig kennslu í japönsku máli og menningu þannig að árið markar ákveðin tímamót í samskiptum Íslands og Japans.

Murakami hafði því miður ekki tök á að koma til Íslands af þessu ánægjulega tilefni en á hátíðarfundi sem haldinn var á skrifstofu hans í Tókýó þann 30. maí sl. veitti hann heiðursdoktorsskjalinu viðtöku frá Ólöfu Garðarsdóttur, forseta Hugvísindasviðs, sem var fulltrúi Jóns Atla Benediktssonar rektors við þetta tækifæri. Þau Kristin Ingvarsdóttir, lektor í japönskum fræðum, og Geir Sigurðsson, prófessor í kínverskum fræðum, voru stödd Tókýó og mættu á viðburðinn sem fulltrúar Mála- og menningardeildar.

Fyrirhugað er að efna til viðburðar um höfundaverk Murakami við Mála- og menningardeild á nýju skólaári.