Fundu erfðabreytu sem hefur áhrif á tónhæð raddar
![Fundu erfðabreytu sem hefur áhrif á tónhæð raddar - á vefsíðu Háskóla Íslands](https://www.hi.is/sites/default/files/styles/efsta_mynd___fr_ttum/public/ghg/kari-rosa-img_3669-1-1280x854.jpg?itok=wBtUhUFq)
Vísindamenn hjá Íslenskri erfðagreiningu og Háskóla Íslands hafa fundið fyrstu erfðabreytuna sem hefur áhrif á tónhæð raddar. Niðurstaða rannsóknarinnar hefur verið birt í grein eftir þau Rósu S. Gísladóttur, dósent í málvísindum við Íslensku- og menningardeild Háskóla Íslands, og Kára Stefánsson, forstjóra Íslenskrar erfðagreiningar, í vísindatímaritinu Science Advances. Fleiri rannsakendur við Háskóla Íslands unnu að greininni, þar á meðal Agnar Helgason, prófessor í mannfræði við Félagsfræði-, mannfræði- og þjóðfræðideild (smellið hér til að lesa greinina í opnum aðgangi). Fjallað hefur verið um rannsóknarniðurstöðuna í fjölmörgum erlendum miðlum, þar á meðal á vef Nature.
Rannsóknin byggist á upptökum af tali um 13.000 Íslendinga sem tóku þátt í heilsurannsókn Íslenskrar erfðagreiningar. Um er að ræða einstakt gagnasafn og fyrstu rannsókn sinnar tegundar um erfðir raddar og tals. Rannsóknin leiddi í ljós að erfðabreyta í geninu ABCC9 hefur áhrif á tónhæð raddarinnar. Athyglisvert er að erfðabreytan sem fannst í rannsókn Íslenskrar erfðagreiningar hefur áhrif á röddina í körlum og konum óháð líkamsstærð. Sama erfðabreyta hefur áhrif á hjarta og æðakerfi og undirstrikar samband tónhæðar og líkamlegrar heilsu.
Í rannsókninni voru einnig skoðuð merki sem endurspegla einstaklingsmun í framburði sérhljóða. Þekkt er að framburður sérhljóða dregur dám af málsamfélaginu en þrátt fyrir það reyndust sérhljóðamerkin að einhverju leyti arfgeng. Líklegt er að áhrif erfða á einstaklingsmun í framburði sérhljóða sé í gegnum breytileika á uppbyggingu og lögun talfæranna.
Í fréttatilkynningu Íslenskrar erfðagreiningar segir að niðurstöður rannsóknarinnar varpi nýju ljósi á einstaklingsmun í rödd og tali og efli skilning á áhrifum erfða þar á.
Smellið hér til að horfa á samræður Rósu S. Gísladóttur og Kára Stefánssonar um greinina.