Fjögur tilnefnd til bókmenntaverðlauna

Þrír kennarar og einn doktorsnemi við Hugvísindasvið Háskóla Íslands eru tilnefnd til Íslensku bókmenntaverðlaunanna og Íslensku þýðingarverðlaunanna 2015 en tilnefningar voru kunngjörðar þriðjudaginn 1. desember.

Í tilviki Íslensku bókmenntaverðlaunanna er tilnefnt í þremur flokkum, flokki barna- og ungmennabóka, fagurbókmennta og flokki fræðibóka og rita almenns eðlis.

Gunnar Theódór Eggertsson, doktorsnemi í almennri bókmenntafræði, er tilnefndur í flokki barna- og ungmennabóka fyrir bókina Drauga-Dísa sem Vaka Helgafell gefur út, en þess má geta að hann hreppti Íslensku barnabókmenntaverðlaunin 2008 fyrir sögu sína, Steindýrin. 

Í flokki fræðibóka og rita almenns eðlis eru þau Dagný Kristjánsdóttir, prófessor í íslenskum nútímabókmenntum, og Gunnar Þór Bjarnason, stundakennari við Hugvísindasvið, tilnefnd. Dagný fær tilnefningu fyrir bókina Bókabörn sem Háskólaútgáfan gefur út en hún hefur að geyma sögu barnabókmennta hér á landi. Gunnar er tilnefndur fyrir bókina Þegar siðmenningin fór fjandans til - Íslendingar og stríðið mikla 1914 1918 sem Mál og menning gefur út en en eins og nafnið gefur til kynna fjallar hún um áhrif fyrri heimstyrjaldarinnar á Íslendinga og um þá hermenn sem fæddir voru á Íslandi og börðust í stríðinu. 

Þá er Ásdís Rósa Magnúsdóttir, prófessor í frönsku máli og bókmenntum, tilnefnd til Íslensku þýðingarverðlaunanna fyrir þýðingu á þremur ritgerðasöfnum, Rangan og réttan, Brúðkaup og Sumar, eftir franska rithöfundinn Albert Camus. Í ritgerðasöfnunum er að finna stutta sjálfsævisögulega texta og hugleiðingar sem veita lesendum aðgang að skáldlegustu hlið Camus. Háskólaútgáfan gefur út.

Íslensku bókmenntaverðlaunin verða afhent um mánaðamótin janúar-febrúar 2016 en Íslensku þýðingarverðlaunin í apríl sama ár.