Háskóli Íslands stefnir á forystu í nýtingu gervigreindar

Háskóli Íslands hefur sett sér nýja og metnaðarfulla stefnu um gervigreind, en hún var samþykkt af háskólaráði þann 4. desember síðastliðinn. Markmið stefnunnar er skýrt: Háskólinn ætlar sér að leiða ábyrga og framsækna innleiðingu tækninnar í íslensku háskólasamfélagi.

Lifandi stefna fyrir breytta tíma

Gervigreindarstefnan nær til allra þátta skólastarfsins, allt frá námi og kennslu til rannsókna og stoðþjónustu. Þar sem tæknin þróast hratt er litið á stefnuna sem lifandi skjal sem verður endurskoðað reglulega.

Meginstoðir stefnunnar eru þrjár:

• að efla færni og þekkingu nemenda og starfsfólks til ábyrgrar, gagnrýninnar og skapandi notkunar gervigreindar,
• að styrkja skilvirkni og nýsköpun innan stjórnsýslu, kennslu og vísindastarfs,
• að tryggja jafnræði og aðgengi að þeim tækjum og stuðningi sem Háskólinn býður.

Í stefnunni er jafnframt að finna nokkur leiðarljós til að tryggja farsæla innleiðingu. Þau snerta akademískan heiðarleika bæði starfsfólks og stúdenta, samræmdar leiðbeiningar um notkun gervigreindar, öryggi gagna, mannréttindi og persónuvernd og faglega ábyrgð og víðtæka samvinnu kjarnasviða skólans.

Hvað gerist næst?

Vinna er þegar hafin við innleiðingu undir forystu sérfræðinga. Meðal fyrstu verkefna er að útbúa leiðbeiningar til kennara, að finna leiðir til að tryggja starfsfólki og stúdentum aðgang að öflugum gervigreindarhugbúnaði og veita viðeigandi þjálfun. Jafnframt verður lögð áhersla á skýrar leiðbeiningar um akademískan heiðarleika og gagnaöryggi auk þess sem þróun á þjónustuspjallmenni fyrir háskólasamfélagið verður hraðað.