Forkröfur fyrir hjúkrunarfræði eða ljósmóðurfræði

Heilbrigðisvísindasvið

Undirbúningsnám –

Námsleið fyrir þau sem hyggjast sækja um ljósmóðurfræði til starfsréttinda (MS). Einnig fyrir nemendur sem stefna á framhaldsnám og eru með íslenskt hjúkrunarleyfi en hafa lokið erlendu háskólaprófi í hjúkrunarfræði sem ekki telst sambærilegt íslensku BS prófi og þurfa að ljúka tilteknum forkröfunámskeiðum áður.

Sækja um nám

Um hvað snýst námið?

Forkröfunám fyrir umsókn í ljósmóðurfræði til starfsréttinda

Fyrir þau sem lokið hafa BS prófi í hjúkrunarfræði og hafa íslenskt hjúkrunarleyfi.

Námið samanstendur af eftirfarandi tveimur námskeiðum, samtals 12 ECTS einingum.

Konur, heilsa og samfélag
Kynheilbrigði

Forkrafa fyrir hjúkrunarfræðinga með íslenskt hjúkrunarleyfi og erlent próf sem ekki telst sambærilegt íslensku BS prófi.

Forkröfuleið A

Á við þau sem eru með hjúkrunarleyfi á Íslandi og hafa lokið hjúkrunarnámi sem jafngildir þriggja ára námi við íslenskan háskóla (180 ECTS). Námið samanstendur af sex námskeiðum, samtals 30 ECTS einingum. Við val á námskeiðum var tekið mið af reynslu af því hvað helst vantar í nám erlendra hjúkrunarfræðinga. Það sem vantar er að öllu jöfnu rannsóknatengt nám og ýmislegt sem lýtur að íslensku heilbrigðisumhverfi. Námskeiðin á kjörsviðinu eru talin endurspegla vel þá vöntun.

Forkröfuleið B

Á við þau sem eru með hjúkrunarleyfi á Íslandi og hafa lokið hjúkrunarnámi sem samsvarar tveggja ára námi við íslenska háskóla (120 ECTS). Námið samanstendur af 9 námskeiðum, samtals 45 ECTS einingum. Við val á námskeiðum var tekið mið af reynslu af því hvað helst vantar í nám erlendra hjúkrunarfræðinga. Það sem vantar er að öllu jöfnu rannsóknatengt nám og ýmislegt sem lýtur að íslensku heilbrigðisumhverfi. Námskeiðin á kjörsviðinu eru talin endurspegla vel þá vöntun.

Inntökuskilyrði

Inntökuskilyrði námsleiðar

Athugið að þessi námsleið er ætluð:

Hjúkrunarfræðingum sem hyggjast sækja um nám í ljósmóðurfræði til starfsréttinda, MS og þurfa áður að ljúka forkröfunámskeiðunum HJÚ823M Kynheilbrigði og HJÚ827M Konur, heilsa og samfélag, samtals 12 einingar.
Hjúkrunarfræðingum með íslenskt hjúkrunarleyfi sem eru með erlent próf í hjúkrunarfræði sem ekki telst sambærilegt íslensku BS prófi og hyggjast fara í framhaldsnám.

Umsækjandi í forkröfunámskeið fyrir umsókn í ljósmóðurfræði til starfsréttinda, MS þarf að hafa lokið BS prófi í hjúkrunarfræði og hafa íslenskt hjúkrunarleyfi. Sé umsækjandi með BS próf frá öðrum háskóla en Háskóla Íslands, þarf að skila inn staðfestu afriti af prófskírteini stimplað og á pappír. Samanburðarmat miðað við íslenska háskóla fer fram hjá Matskrifstofu HÍ.

Umsækjandi í forkröfuleið A fyrir hjúkrunarfræðinga (30e) þarf að hafa lokið prófi í hjúkrunarfræði sem telst samsvarandi þriggja ára námi við íslenskan háskóla (180 ECTS) og starfsleyfi sem hjúkrunarfræðingur á Íslandi. Jafnframt þarf umsækjandi að búa yfir góðri íslensku- og enskukunnáttu. Öll kennsla fer fram á íslensku. Umsækjandi með próf frá erlendum skóla þarf að skila inn staðfestu afriti af prófskírteini stimplað og á pappír. Samanburðarmat miðað við íslenska háskóla fer fram hjá Matskrifstofu HÍ.

Umsækjandi í forkröfuleið B fyrir hjúkrunarfræðinga (45e) þarf að hafa lokið prófi í hjúkrunarfræði sem telst samsvarandi tveggja ára námi við íslenskan háskóla (120 ECTS) og starfsleyfi sem hjúkrunarfræðingur á Íslandi. Jafnframt þarf umsækjandi að búa yfir góðri íslensku- og enskukunnáttu. Öll kennsla fer fram á íslensku. Umsækjandi með próf frá erlendum skóla þarf að skila inn staðfestu afriti af prófskírteini stimplað og á pappír. Samanburðarmat miðað við íslenska háskóla fer fram hjá Matskrifstofu HÍ.

Skipulag náms

Óháð námsári

Vor
Kynheilbrigði
Konur, heilsa og samfélag

Kynheilbrigði (HJÚ825G)

Í námskeiðinu kynnast nemendur hugmyndafræði kynheilbrigðis og skoða mikilvæga þætti er varða kynheilbrigði einstaklingsins, parsins og hvernig samfélagið getur haft mótandi áhrif á kynverund mannsins. Einnig kynnast nemendur margvíslegum áhrifaþáttum á kynheilbrigði eins og og sjúkdóma sem geta raskað eðlilegri starfsemi líkamans og haft áhrif á náin sambönd og kynferðislega velllíðan. Námskeiðinu er ætlað að efla nemendur í að sinna kynheilbrigðismálum með því að gefa þeim góðan þekkingarlegan grunn út frá máttarstólpum sem varða réttindi kynverundar, veita nemendum tækifæri á að æfa sig að ræða og veita stuðning og fræðslu um kynlífstengd málefni.

Áhersla er lögð á að nemendur glöggvi sig á megin áhrifavöldum í mótun kynverundar og hvernig þeir geti sýnt skilning og víðsýni gagnvart ólíkum þörfum og sjónarmiðum skjólstæðinga sinna.

Ætlast er til að nemendur noti umræðuvef námskeiðsins og skili verkefnum rafrænt. Svo kennslustundir nýtist nemendum sem best og nemandi geti verið virkur í umræðutímum, er nemendum bent á að koma undirbúnir í allar kennslustundir.

Nánar um námskeiðið

Konur, heilsa og samfélag (HJÚ828G)

Námskeiðið fjallar um konur heilsu og samfélag. Fjallað er um líffræðilega, sál-/félags- og umhverfislega þætti sem hafa áhrif á heilbrigði kvenna. Pólitísk stefnumótun og hugmyndir um heilbrigði og skoðaðar í kynjafræðilegu samhengi. Unnið er út frá heildrænu sjónarmiði um æviskeiðin og fjallað um áhrif lífsviðburða, sjúkdóma og lyfja. Í námskeiðinu er einnig fjallað um sérhæfða líffæra- og lífeðlisfræði kvenna og barneignarferli, algenga kvensjúkdóma og helstu hugtök í erfðafræði og litningarannsóknum í tengslum við meðgöngu.

Nánar um námskeiðið

Öll fög eru skyldufög nemaVValfagBBundið val er háð skilyrðum ENámskeiðið er ekki kennt á misserinuNámsleiðin í Kennsluskrá

Dæmi um starfsvettvang

BS-nám í hjúkrunarfræði veitir rétt til þess að sækja um starfsleyfi hjúkrunarfræðings.

Hjúkrunarfræðingar starfa á fjölbreyttum vettvangi atvinnulífsins og tækifærin til fjölbreyttra starfa eru víðsvegar hjá fyrirtækjum og stofnunum.

Hjúkrunarfræðingar starfa meðal annars við:

Sjúkrahús
Heilsugæslu
Geðvernd
Endurhæfingu
Fræðslu og forvarnir
Hjálparstarf
Stjórnun og stefnumótun

Listinn er ekki tæmandi.

Útskrifaðir nemendur hjúkrunarfræðideildar eru eftirsóttir starfsmenn um allan heim. Samkvæmt flokkun Shanghai Rankings (ARWU) raðast hjúkrunarfræði við Háskóla Íslands í 100. til 150. sæti af öllum hjúkrunarfræðideildum í heiminum.

Mikil eftirspurn er hérlendis eftir hjúkrunarfræðingum.

Lesa meira um starfsvettvang hjúkrunarfræðinga

Mögulegt framhaldsnám með þessa menntun

Bóka viðtal í náms-og starfsráðgjöf

Hvað segja nemendur?

Rakel Haraldsdóttir

Hjúkrunarfræði, BS

Ég íhugaði það að fara í hjúkrunarfræði beint eftir menntaskóla en ákvað að fara aðra leið. Seinna fór ég að vinna á Landspítalanum og kynntist starfi hjúkrunarfræðinga betur og hugsaði oft með mér að ég hefði átt að læra þetta en fannst 4 ára námið aðeins of langt til að ég gæti skráð mig í það. Ég var svo ekki lengi að hugsa mig um þegar ég sá tækifæri til þess að taka sama námið á fljótari yfirferð. Það hefur komið mér á óvart hvað námið er fjölbreytt, en það endurspeglar auðvitað bara hve fjölbreytt störf hjúkrunarfræðinga eru. Ég er mjög ánægð með að boðið sé uppá þessa leið og vona að þessi valkostur sé kominn til að vera, enda góður hópur með fjölbreyttan bakgrunn sem stundar námið.

—

Þórunn Friðriksdóttir

Hjúkrunarfræði, BS

Það hefur lengi blundað í mér að fara í hjúkrunarfræði og þegar ég heyrði af þessari námsleið vissi ég að hún væri fullkomin fyrir mig. Ég sem þroskaþjálfi sé ótal mörg tækifæri í því að tvinna þessar tvær starfstéttir, sem hafa oft ekki sömu sýn á hlutina, saman. Það eru afar spennandi tímar framundan og ég hlakka til að sjá hvaða dyr þessi námsleið mun opna fyrir mig. Námið er krefjandi en um leið mjög skemmtilegt. Þessi gráða er ótrúlega góð viðbót við hvaða menntun sem er og nánast tryggir starfsöryggi enda er alltaf þörf á góðum hjúkrunarfræðingum. Um leið er starfið svo fjölbreytt að allir ættu að finna sér starfsvettvang við hæfi.

—

Hafðu samband

Skrifstofa Hjúkrunar- og ljósmóðurfræðideildar
Eirberg, 1. hæð, Eiríksgata 34
101 Reykjavík
Sími 525 4960
hjukrun@hi.is

Opið virka daga frá kl. 9 - 14

Við erum á Facebook

Hjálplegt efni

Ertu með fleiri spurningar? Hér finnurðu svör við ýmsum þeirra og upplýsingar um ýmislegt annað sem gott er að hafa í huga þegar þú velur nám.