Að skilja dyslexíu: Áhrif skilgreiningar á kennslu og greiningar á Íslandi

Zoom fyrirlesturinn, Að skilja dyslexíu: Áhrif skilgreiningar á kennslu og greiningar á Íslandi fer fram í streymi þriðjudaginn 17. mars kl.15.00 - 17.00.

Fyrirlesturinn er hluti af fyrirlestrarröð Menntavísindasviðs HÍ, Efst á baugi og unnin í samstarfi við Rannsókna- og fræðslustofu um þroska, læsi og líðan barna og ungmenna. 

Í fyrirlestrinum munu Dr. Hugh Catts og Dr. Charles Haynes fjalla um nýja skilgreiningu á dyslexíu (lesblindu). 

Í október 2025 var endurskoðuð skilgreining á dyslexíu gefin út af Alþjóðlegu dyslexíusamtökunum (International Dyslexia Association). Staða lestrargreininga á Íslandi er óljós og mikilvægt að nýjustu rannsóknir verði hafðar til hliðsjónar þegar brugðist er við lestrarvanda.

Í erindinu verður fjallað um mótun nýju skilgreiningarinnar, ástæður þess að sú eldri var endurskoðuð og hvaða vísindalegu gögn liggja til grundvallar. Jafnframt verður fjallað um áhrif skilgreiningarinnar á kennslu og greiningar.

Dagskrá: 

Fundarstjóri: Auður Soffíu Björgvinsdóttir 

15:00 - Opnunarávarp

Kolbrún Þ. Pálsdóttir, forseti Menntavísindasviðs HÍ 

15:05 - 16:30 - Fjallað um nýja skilgreiningu á dyslexíu (lesblindu)

Dr. Hugh Catts og Dr. Charles Haynes

16:30 - 17:00 - Fyrirspurnir í gegnum Zoom

Dr. Catts starfar við School of Communication Science and Disorders við Florida State University. Rannsóknir hans beinast m.a. að snemmtækri greiningu og forvörnum gegn lestrarvanda auk mats á lesskilningserfiðleikum. Hann hefur áður setið í stjórn Alþjóðlegu dyslexíusamtakanna (International Dyslexia Association) og einnig setið í stjórn og verið forseti Society for the Scientific Study of Reading. Hann hefur hlotið Samuel T. Orton-verðlaunin frá Alþjóðlegu dyslexíusamtökunum og heiðursviðurkenningu frá American Speech-Language-Hearing Association fyrir framlag sitt.

Dr. Haynes er prófessor emeritus við MGH Institute of Health Professions í Boston. Hann var frumkvöðull í þróun kennsluaðferða fyrir börn með dyslexíu og málörðugleika.
Rannsóknir hans beinast að tengslum talaðs og ritaðs máls og þeim þáttum sem hafa áhrif á læsi og læsisnám á ólíkum tungumálum. Árið 2014 hlaut hann Margaret Byrd Rawson Lifetime Achievement Award frá Alþjóðlegu dyslexíusamtökunum fyrir framlag sitt til dyslexíufræða, og árið 2025 hlaut hann Legacy Award samtakanna fyrir að hafa komið á fót og byggt upp alþjóðlegt samstarfsnet þeirra (Global Partners).

Fyrirlesturinn verður í beinu streymi.

Hlekkur á streymi hér

Verið öll velkomin