Prófessor við HÍ nýr forstjóri Landspítala

Runólfur Pálsson, prófessor og varaforseti Læknadeildar Háskóla Íslands og framkvæmdastjóri meðferðasviðs og yfirmaður COVID-göngudeildar Landspítalans, hefur verið skipaður í embætti forstjóra Landspítala til næstu fimm ára. Tilkynnt var um þetta í dag.

Runólfur hefur starfað við Háskóla Íslands í yfir tvo áratugi. Hann var ráðinn lektor í lyflæknisfræði við skólann árið 1999, hlaut framgang í starf dósents árið 2004 og í starf prófessors árið 2014. Hann státar af embættisprófi í læknisfræði frá Háskóla Íslands 1985 en í framhaldsnámi lagði hann stund á nám í lyflækningum við Hartford Hospital og University of Connecticut 1988-1991 og í nýrnalækningum við Massachusetts General Hospital og Harvard Medical Shoool í Boston 1991-1996. Hann lauk bandaríska sérfræðiprófinu í lyflækningum árið 1991 og í nýrnalækningum árið 1996. 

Runólfur hefur leiðbeint nemendum í doktorsnámi og meistaranámi við Læknadeild Háskóla Íslands auk fjölda læknanema og ungra lækna. Fram kemur í tilkynningu heilbrigðisráðuneytisins vegna skipunarinnar að Runólfur hafi mikla reynslu og þekkingu á kennslu- og þjálfunarhlutverki spítalans. „Hann var kennslustjóri lyflækningasviðs og staðgengill framhaldsmenntunarstjóra lyflækningasviðs Landspítala auk þess að hafa komið að fjölda nefnda og annarra stefnumótandi starfa í tengslum við kennslu- og þjálfunarhlutverk spítalans.“

Afar afkastamikill vísindamaður

Runólfur er enn fremur afar afkastamikill vísindamaður og hefur stundað umfangsmiklar rannsóknir á nýrnasjúkdómum. Meginviðfangsefnin hafa verið faraldsfræði og erfðafræði langvinns nýrnasjúkdóms annars vegar og nýrnasteinasjúkdóms hins vegar. Hefur hann m.a. komið að tímamótauppgötvunum á fyrrnefnda sviðinu. Runólfur hefur m.a. unnið með Hjartavernd og Íslenskri erfðagreiningu að ýmsum rannsóknum tengdum langvinnum nýrnasjúkdómi.

Runólfur hefur birt á annað hundrað ritrýndra greina og bókarkafla og hefur átt aðild að liðlega 300 ágripum sem kynnt hafa verið á vísindaþingum. Þá hefur hann haldið fjölda boðsfyrirlestra víða um heim. Einnig hefur Runólfur verið einn af ritstjórum og ábyrgðarmönnum Handbókar í lyflæknisfræði.

„Þá hefur hann gegnt leiðandi hlutverki á alþjóðavettvangi á sviði lyflæknisfræði. Hann hefur verið afkastamikill í vísindastarfi og hefur mikinn metnað og skýra sýn á akademískt hlutverk spítalans og umbætur á því sviði sem og mikilvægi tengsla spítalans við háskólastofnanir,“ segir einnig í tilkynningu heilbrigðisráðuneytisins.

Runólfur hefur einnig gegnt fjölmörgum trúnaðarstörfum innan lands sem utan og var m.a. forseti European Federation of Internal Medicine 2016-2018. Þá hefur hann fengið ýmis verðlaun og viðurkenningar fyrir störf sín, þar á meðal nafnbótina heiðursvísindamaður Landspítala árið 2018.

Runólfur tekur við embætti forstjóra 1. mars næstkomandi.

Háskóli Íslands óskar Runólfi Pálssyni innilega til hamingju með starfið.