Rússneska

Hugvísindasvið

Aukagrein – 60 einingar

Rússneska er eitt af útbreiddustu tungumálum veraldar og hafa um 150 milljónir manna rússnesku að móðurmáli. Kunnátta í rússnesku er mikilvæg fyrir pólitísk, efnahagsleg og ekki síst menningarleg samskipti við Rússland, löndin sem áður tilheyrðu Sovétríkjunum og Austur-Evrópu.

Um hvað snýst námið?

Þetta nám er 60 eininga aukgrein og hægt er að taka 120 eininga aðalgrein með því. Til að útskrifast með BA próf þarf að klára 180 einingar.

Nám í rússnesku við Háskóla Íslands er opið nemendum sem ekki hafa kunnáttu í rússnesku fyrir.Námið er í senn hagnýtt og fræðilegt.

Annars vegar er um að ræða tungumálanám þar sem nemendur fá kennslu og þjálfun í notkun tungumálsins, talþjálfun, ritun, hlustun og lesskilningi. Hins vegar nám í bókmenntum, menningu, sögu og stjórnmálum Rússlands.

Meðal viðfangsefna

Vinnulag og aðferðir í hugvísindum
Rússnesk málfræði
Rússnesk málnotkun
Saga og menning Rússlands
Rússland á tuttugustu öld: Sovétsaga
Rússnesk stjórnmál og samfélag
Rússneskar bókmenntir og textar
Hugmyndasaga og tungumál

Athugið að sum námskeið eru kennd annað hvert ár.

Annað

Einnig er hægt að taka rússnesku sem:

60 eininga diplóma

Meira um Aðal- og aukagreinar undir Hjálplegt efni neðst á síðunni.

Námskröfur

Til þess að ljúka aukagrein í rússnesku þurfa nemendur að ljúka öllum skyldunámskeiðum sem tilgreind eru á námsleiðinni:

- RÚS103G Rússnesk málfræði I
- RÚS104G Rússnesk málnotkun I
- RÚS108G Rússnesk málfræði II
- RÚS109G Rússnesk málnotkun II

Auk þessa þurfa nemendur að ljúka að lágmarki sex námskeiðum í bundnu vali. Námskeið í bundnu vali eru breytileg milli námsára.

Nemendum gefst kostur á að ljúka náminu á einu ári með því að taka hluta námskeiða sem sjálfstæð verkefni eða valnámskeið innan námsleiðarinnar og námsbrauta sem samstarf er við.

Til að nýta sem best þau námskeið sem boðið er upp á í námsleiðinni er ákjósanlegt að taka námskeiðin í bland við annað nám við Háskóla Íslands á sama tíma og dreifa þeim þannig yfir 2 eða 3 ár.

Umsjónarmenn námsins aðstoða nemendur við að skipuleggja nám sitt eftir aðstæðum hvers og eins.

Öll skyldunámskeið og námskeið í bundnu vali innan námsleiðarinnar eru fimm ECTS-einingar og eru kennd ýmist á fyrri eða seinni hluta viðkomandi misseris.

Skipulag náms

Mögulegt framhaldsnám með þessa menntun

Bóka viðtal í náms-og starfsráðgjöf

Hvað segja nemendur?

Matthildur Lillý Valdimarsdóttir

Rússneska - BA nám

Ég tók ákvörðun um að byrja í námi í rússnesku við Háskóla Íslands eftir að hafa prófað mig áfram í öðrum greinum sem náðu ekki alveg nógu mikið til mín. Ég sé svo aldeilis ekki eftir þeirri ákvörðun enda er hún ein sú besta sem ég hef tekið í lífinu. Námið er persónulegt, samband við kennarana er náið og nemendahópurinn fámennur og góður. Það sem gerir námið svo einstakt og frábært eru kennararnir, sem hafa mikla ástríðu fyrir námsefninu, eru reynslumiklir, skilningsríkir og sérstaklega skemmtilegir. Áhugi þeirra á efninu er smitandi sem gerir það að verkum að það er alltaf gaman að mæta í tíma. Rússneskan er gullfallegt mál og ótrúlega áhugavert svo ekki sé meira sagt. Námið er krefjandi en á góðan hátt og maður vill leggja vinnuna á sig. Rússneska þjóðin er auðug af merkilegum bókmenntum og landið á sér mikla sögu sem gaman er að fræðast um.

—

Símon Birgir Stefánsson

Rússneska - BA nám

Að ákveða að fara í rússnesku í HÍ er örugglega ein af bestu ákvörðunum lífs míns. Maður kynnist bæði nemendum og kennurum mjög vel, en kennararnir eru algjört æði. Þeim tekst að kenna námsefnið á skemmtilegan hátt og aldrei hefði ég haldið að málfræði gæti verið jafn áhugaverð og hún er. Námið er ótrúlega lærdómsríkt og gefandi og get ég ekki mælt nógu mikið með því!

—

Hafðu samband

Skrifstofa Hugvísindasviðs
Aðalbygging, 3.hæð - Sæmundargötu 2

Sími: 525 4400
Netfang: hug@hi.is
Skrifstofan er opin virka daga frá kl 10:00–12:00 og 13:00–15:00.

Nemendur á Hugvísindasviði geta einnig nýtt sér Þjónustutorg í Gimli og Þjónustuborð á Háskólatorgi. Hægt er að nálgast upplýsingar í netspjalli hér á síðunni.

Fylgstu með Hugvísindasviði: