Háskólaráðherra heimsótti Viðskiptafræðideild

Áslaug Arna Sigurbjörnsdóttir háskóla,- iðnaðar- og nýsköpunarráðherra kom í heimsókn til Viðskiptafræðideildar í gær, mánudag, í kjölfar umræðna um nám í viðskiptafræði. Heimsóknin var vettvangur fyrir samtal á milli ráðherra og deildarfólks um málefni viðskiptafræðinnar og stöðu hennar innan háskólanna. 

Nám í viðskiptafræði býður upp á fjölbreytta möguleika

Gylfi Magnússon deildarforseti, Jón Atli Benediktsson rektor, Stefán Hrafn Jónsson, sviðsforseti Félagsvísindasviðs, og kennarar við deildina kynntu ráðherra fyrir því fjölbreytta starfi sem á sér stað innan Viðskiptafræðideildar. Þar var meðal annars komið inn á það hvernig nám við deildina nýtist fjölbreyttum hópi fólks og á fjölbreyttum sviðum samfélagsins, hver svo sem bakgrunnur fólks er. Ráðherra og aðrir gestir voru sammála því en bent var á að nemendur í meistaranámi við deildina komi meðal annars úr jafnólíkum deildum og hjúkrunarfræði og verkfræði. Nýsköpun og framtíð háskólanáms og háskóla á Íslandi var einnig til umræðu og leyfði ráðherra deildarfólki að skyggnast inn í það sem er á döfinni innan ráðuneytisins í þeim efnum. 

Rannsóknarstarf deildarinnar

Runólfur Smári Steinþórsson, prófessor við deildina, færði ráðherra þrjú rit sem komið hafa út í ritröðinni Rannsóknir í viðskiptafræði þar sem má finna fjölbreyttar rannsóknir á sviði viðskiptafræðinnar. Þar má meðal annars nefna rannsóknir á sviði sjávarútvegs, iðnaðar, orku, fjármála og nýsköpunar. Meðal þess sem ráðherra hampaði deildinni fyrir er gott rannsóknarstarf og rannsóknarsamstarf deildarinnar við stofnanir. Vísaði þar í samstarf við Matís og fleiri stofnanir og fyrirtæki en mikilvægi þess að eiga í góðu samstarfi við atvinnulífið og öflug fyrirtæki, meðal annars á sviði vísinda, var einnig rætt. 

Mikilvægt að fjölga nemendum í háskólanámi

Ráðherra kvaðst mjög opin fyrir því að eiga í virku samtali við háskólasamfélagið og starfsfólk þess og sagðist hún fagna öllum ábendingum og spurningum. Þá lagði ráðherra einnig mikla áherslu á að þó að það þyrfti að fjölga nemendum í einni grein þyrfti ekki að fækka í öðrum greinum, það væri mikilvægt að fjölga nemendum almennt í háskólanámi. Einnig þyrfti að fjölga körlum sem sækja nám við háskóla landsins. Vísaði ráðherra þar til átaks sem er að hefjast á vegum ráðuneytisins og snýr að því að hvetja stráka til þess að bíða ekki með háskólanám en hvergi er hlutfall karlkyns háskólanema lægra en á Íslandi. 

Myndir Kristins Ingvarssonar frá heimsókn ráðherra má sjá hér að neðan.