Byrjun mars – 20. maí: Opið fyrir rafrænar umsóknir í læknisfræði, sjúkraþjálfunarfræði og tannlæknisfræði á vef HÍ Umsókn um nám í læknisfræði, sjúkraþjálfunarfræði eða tannlæknisfræði jafngildir skráningu í inntökuprófið. Athugið að sækja skal um með rafrænum skilríkjum. Hafi umsækjandi ekki rafræn skilríki er hægt að fá þau hjá Auðkenni. Þegar umsókn hefur verið lögð inn á umsækjanda að berast móttökukvittun frá umsokn@hi.is sem inniheldur upplýsingar um næstu skref. Hafi umsækjandi ekki fengið móttökukvittun er hann ekki skráður í prófið. • Miðvikudagurinn 20. maí – Umsóknarfrestur rennur út! Frestur til að sækja um grunnnám í læknisfræði, sjúkraþjálfunarfræði eða tannlæknisfræði (skráning í inntökupróf Læknadeildar og Tannlæknadeildar) rennur út á miðnætti. Engar undantekningar eru gerðar á þessu ákvæði! • Miðvikudagurinn 20. maí – Skilafrestur fylgigagna Hafi umsækjandi ekki veitt heimild fyrir rafrænum skilum á stúdentsprófi úr Innu í umsóknarferlinu þarf hann að skila staðfestu afriti af stúdentsprófsskírteini, eða staðfestingu um að stúdentsprófi verði lokið áður en inntökupróf hefst, á pappír til Nemendaskrár Háskóla Íslands. • Miðvikudagurinn 20. maí – Umsóknarfrestur um úrræði Síðasti dagur til að skila inn beiðni um úrræði til Nemendaráðgjafar HÍ. Úrræði á inntökuprófi Samkvæmt reglum Háskóla Íslands um úrræði í námi nr. 481/2010 skal nemandi sem óskar eftir úrræðum í námi/prófum við Háskóla Íslands vegna fötlunar, langvarandi veikinda eða sértækra námsörðugleika snúa sér til Nemendaráðgjafar HÍ (NHÍ). Úrræði eru aðeins veitt á grundvelli faglegrar greiningar sem nemandi leggur fram og ráðgjafi fer yfir og geymir afrit af. Ásamt því að leggja fram greiningu fer nemandi í viðtal hjá ráðgjafa. Stúdentar sem þreyta inntökupróf í Læknadeild og óska eftir lengdum próftíma eða öðrum úrræðum er bent á að bóka viðtal á bókunarsíðu NHÍ en einnig er hægt að senda fyrirpurnir á netfang: urraedi@hi.is eða hafa samband í síma: 525 4315. Afgreiðslu umsókna lokið: Tölvupóstur sendur á umsóknarnetföng samþykktra umsækjenda. • Mánudagurinn 1. júní kl. 16:00 – Greiðslufrestur próftökugjalds rennur út! Fljótlega eftir að umsóknarfresti lýkur mun möguleiki til greiðslu á próftökugjaldi kr 35.000,- birtast inn í samskiptagáttinni undir flipanum “Yfirlit umsókna”. Greiða þarf gjaldið í síðasta lagi fyrir kl. 16:00 á eindaga 1. júní. Hafðu strax samband við Nemendaskrá (umsokn@hi.is) ef þú færð ekki upp greiðslumöguleikann í samskiptagáttinni. Athugið að próftökuréttur er háður settum greiðslufrest og próftökugjaldið er óendurkræft. Engar undantekningar eru gerðar á þessu ákvæði! Byrjun júní: - Tölvupóstur sendur á umsóknarnetföng próftaka með upplýsingum um notendanöfn og aðgangsorð sem þeir nota til að komast inn í INSPERA. - Próftökum gefst færi á að prufukeyra fartölvur sínar í Safe Exam Browser (SEB) og taka prufupróf. Ef próftakar lenda í vandræðum með að setja upp SEB geta þeir haft samband við tölvuþjónustu UTS. Ef í ljós kemur í prufuprófinu að tölvan virkar ekki með INSPERA verður hægt að fá Chromebook-lánstölvu til afnota í prófinu. - Tölvupóstur sendur á umsóknarnetföng próftaka með upplýsingum um staðsetningu (prófstaður, hús, stofa, borð) en listi yfir (niðurröðun) próftaka mun einnig hanga uppi á prófstöðum. • Fimmtudagurinn 11. júní og föstudagurinn 12. júní – Inntökupróf haldið! Inntökuprófið samanstendur af sex tveggja klukkustunda próflotum sem dreifast á tvo daga. Niðurstöður birtar: Gert er ráð fyrir að það taki allt að einn mánuð að fara yfir úrlausnir. Þegar niðurstöður liggja fyrir verða þær sendar próftökum í tölvupósti ásamt frekari upplýsingum. Próftakar sem ekki öðlast rétt til náms í þeirri námsgrein sem þeir sóttu um fá möguleika á að sækja um í annað nám (að undanskyldu námi sem krefst inntökuprófs) eftir að niðurstöður hafa verið birtar. • Mánudagurinn 10. ágúst - Kennsla hefst í læknisfræði (ath. skyldumæting fyrstu vikuna). • Mánudagurinn 17. ágúst - Kennsla hefst í sjúkraþjálfunarfræði og tannlæknisfræði. Vinsamlegast hafðu samband við skrifstofu Læknadeildar í síma 525 4899 eða á netfang medicine@hi.is hafir þú fyrirspurnir eða athugasemdir. facebooklinkedintwitter
