Rannsóknarverkefni hlýtur öndvegisstyrk
Rannsóknarverkefnið Hreyfanleiki og þverþjóðleiki á Íslandi fékk öndvegisstyrk frá Rannís fyrir tímabilið 2016-2018. Verkefnið er skipulagt af Kristínu Loftsdóttur, prófessor í mannfræði, Unni Dís Skaptadóttur prófessor í mannfræði, og Sigurjóni B. Hafsteinssyni, prófessor í safnafræði, öll við Félags- og mannvísindadeild Félagsvísindasviðs.
Lykilmarkmið verkefnisins er að hvetja til og stuðla að þverfaglegum rannsóknum á ólíkum tegundum hreyfanleika til og frá Íslandi síðustu áratugi og flóknum afleiðingum þeirra. Verkefnið hefur þrjár megin stoðir: Félagslegar og menningarlegar víddir þar sem leitast er eftir að skilja hvernig íslenskt samfélag og menning hefur mótast af hreyfanleika til og frá Íslandi, áhrif stofnanalegra og lagalegra breytinga á hreyfanleika og áhrif hreyfanleika á listir og menningarpólitík á Íslandi. Verkefnið skoðar þannig á nákvæman hátt hvernig Ísland hefur á síðastliðnum áratugum orðið hluti af flóknu neti alþjóðasamskipta sem hafa falið í sér aukinn fjölda innflytjenda og flutninga frá Íslandi á tímum efnahagsþrenginga. Að auki hefur fjöldi fólks sótt um hæli á Íslandi og landið orðið að mikilvægum komustað ferðamanna.
Fjöldi fræðimanna frá Félags- og mannvísindadeild og öðrum deildum Félagsvísindasviðs tekur þátt í verkefninu sem veitir vettvang til að kynna rannsóknir þeirra með útgáfum og ráðstefnuhaldi. Verkefnið gerir sýnilega þá miklu þekkingu sem er á málaflokknum innan ólíkra fagsviða á Félagsvísindasviði og hvetur til aukinnar þekkingarsköpunar á hreyfanleika og þverþjóðleika.
Stjórnendur verkefnisins byggja jafnframt á áralangri rannsóknarreynslu á ólíkum þáttum verkefnisins. Unnur Dís Skaptadóttir hefur m.a. unnið rannsóknir á þverþjóðleika og atvinnuþátttöku innflytjenda á Íslandi um árabil, Kristín Loftsdóttir á fordómum og mótun íslensks þjóðernis og Sigurjón B. Hafsteinsson á menningarpólitík og söfnum í íslensku samfélagi. Stjórnendur verkefnis eru allir hluti af Mark – Miðstöð margbreytileika- og kynjarannsókna á Félagsvísindasviði.
