Seinni umferð rektorskjörs 26. og 27. mars

Seinni umferð rektorskjörs við Háskóla Íslands fer fram 26. og 27. mars þar sem kosið verður á milli Magnúsar Karls Magnússonar, prófessors við Læknadeild, og Silju Báru R. Ómarsdóttur, prófessors við Stjórnmálafræðideild.

Þar sem enginn frambjóðenda fékk meirihluta greiddra atkvæða í rektorskjöri 18. og 19. mars þarf samkvæmt reglum Háskóla Íslands að kjósa aftur. Kjörfundur hefst kl. 9.00 miðvikudaginn 26. mars og lýkur fimmtudaginn 27. mars kl. 17.00. Kosningarnar fara fram á Uglu, innri vef Háskóla Íslands.

Sama kjörskrá liggur til grundvallar seinni umferð rektorskjörs. Á kjörskrá eru 14.557 einstaklingar, 1.752 starfsmenn og 12.805 nemendur. Ef kjósandi á í vandræðum með að kjósa af persónulegum eða tæknilegum ástæðum er aðstoð veitt við að kjósa af starfsfólki Upplýsingatæknisviðs HÍ. Það er gert á þjónustuborði á Háskólatorgi frá kl. 9-15 báða kjördaga. 

Þótt sjálfsagt sé og eðlilegt að starfsfólk lýsi stuðningi við einstaka frambjóðendur og taki virkan þátt í umræðum um kosningarnar, vill kjörstjórn, að gefnu tilefni, biðla til starfsfólks og nemenda að nota ekki aðgang að HÍ-tölvupóstföngum eða aðrar upplýsingamiðlunarleiðir sem tengjast starfsemi skólans til að koma á framfæri afstöðu sinna til málefna eða með því að brýna kjósendur til að greiða tilteknum frambjóðanda atkvæði sitt.