Háskóli Íslands flytur ofurtölvu í húsnæði Veðurstofunnar
Háskóli Íslands hefur fært hluta af tölvusal sínum í húsnæði Veðurstofu Íslands. Um er að ræða tölvubúnað IREI, Icelandic Research e-Infrastructure sem fjármagnaður er af vegvísi um rannsóknainnviði Innviðasjóðs Rannís. IREI styður rannsóknir vísindafólks frá háskólum og
rannsóknastofnunum um allt land, meðal annars á sviðum loftslagsmála, náttúruvár, gagnavísinda og heilbrigðisvísinda.
Samrekstur tölvusalarins er liður í öflugu samstarfi Háskóla Íslands og Veðurstofunnar sem byggir á sameiginlegri sýn um að efla innviði fyrir rannsóknir og samfélagslega þjónustu, meðal annars með áherslu á loftslagsmál, náttúruvá og alþjóðlegt vísindasamstarf.
Við formlega opnun tölvusalsins fluttu ávörp Jón Atli Benediktsson, rektor Háskóla Íslands, og Hildigunnur H. H. Thorsteinsson, forstjóri Veðurstofu Íslands. Í máli þeirra beggja kom fram að samvinna stofnananna væri lykill að því að tryggja trausta og öfluga innviði fyrir útreikninga og gagnavinnslu sem nýtist samfélaginu í heild.
Jón Atli þakkaði Veðurstofunni fyrir að hýsa tölvusalinn og fyrir frábært samstarf í gegnum tíðina. Nefndi hann að samstarfsfletir HÍ og Veðurstofunnar væru mjög margir, meðal annars í IREI. Þörfin fyrir IREI er mikil á Íslandi þar sem kröfurnar í vísindastarfi um mikla reiknigetu og geymslur fyrir stór gagnasöfn aukast sífellt.
Hildigunnur lagði sérstaka áherslu á að þessir innviðir væru forsenda þess að Veðurstofan geti sinnt sínu lögbundna hlutverki í spám og viðvörunum vegna náttúruvár eins og flóða og eldgosa, auk þess sem þeir styrki rannsóknir á loftslagsbreytingum og áhrifum þeirra á Íslandi.
„Með því að efla þessa innviði stöndum við betur að vígi í rannsóknum og þróun á veðurspám og viðvörunum vegna eldgosa, jarðskjálfta og flóða sem og á fjölda annarra sviða sem snerta öryggi, viðbúnað og áfallaþol íslensks samfélags,“ sagði Hildigunnur H. H. Thorsteinsson, forstjóri Veðurstofu Íslands.
IREI byggir á fjórum meginþáttum þjónustu:
- Ráðgjöf og sérfræðiaðstoð fyrir rannsóknarhópa
- Öflug og örugg gagnageymsla
- Aðgangur að mikilli reiknigetu og ofurtölvum
- Lausnir sem styðja gagnadeilingu og samstarf, bæði innanlands og á alþjóðavettvangi
