Guðný Gústafsdóttir brautskráist sem doktor

Föstudaginn 30.september varði Guðný Gústafsdóttir doktorsritgerð sína "Mediated through the Mainstream: Image(s) of Femininity and Citizenship in Contemporary Iceland 1980-2000" við Stjórnmálafræðideild Háskóla Íslands. 

Andmælendur voru dr. Karen Ross, prófessor í kynja- og fjölmiðlafræði við Háskólann í Newcastle, og dr. Guðný Guðbjörnsdóttir, prófessor í uppeldis- og menntunarfræði, Menntavísindasviði Háskóla Íslands. 

Dr. Baldur Þórhallsson, prófessor og deildarforseti stjórnaði athöfninni sem fór fram í Hátíðasal, Aðalbyggingu. 

Rannsóknarefni Guðnýjar var ímynd(ir) kvenleika og þegnréttar á Íslandi samtímans 1980-2000. 

Ímynd kvenna á Íslandi samtímans hefur verið samofin kynjajafnrétti. Ímyndin á rætur í 

sögunni og var á síðustu áratugum styrkt með félagslegum athöfnum, svo sem kosningu 

Vigdísar Finnbogadóttur sem forseta árið 1980 og framboði Kvennalista til Alþingis. Þegar ímyndin er mátuð við stöðu kvenna kemur í ljós ákveðin mótsögn. Þrátt fyrir framgang kvenna, formlegt kynjajafnrétti, mikla menntun og atvinnuþátttöku, hafa völd og áhrif kvenna í hinu opinbera rými haldist takmörkuð.

Í doktorsritgerðinni er leitast við að varpa ljósi á þessa mótsögn með því að greina hugmyndir um kvenleika og þann þegnrétt sem þeim fylgdi í orðræðu tímarita sem gefin voru út á tímabilinu 1980-2000. Ímynd hins kvenlega þegns á Íslandi samtímans var greind með hliðsjón af menningarbundnum, pólitískum og hugmyndafræðilegum áhrifavöldum.

Guðný Gústafsdóttir stundaði nám í þýskum nútímabókmenntum, félagsfræði og norrænum bókmenntum við Alberts-Ludwig Universität Freiburg og Freie Universität Berlin í Þýskalandi. 

Hún lauk diploma í rekstrar- og viðskiptafræði 2001 og MA í kynjafræði frá Háskóla Íslands 2009. Synir Guðnýjar eru Elís Mar og Gústaf Berg.