Vel sóttur Verkefnastjórnunardagur

Ráðstefnan Verkefnastjórnunardagurinn (Project Management Day) var haldin í fyrsta sinn í Háskóla Íslands þann 16. maí. Hún var afar vel sótt og hlaut mikla athygli hjá sérfræðingum og fyrrverandi og núverandi nemendum

Tvær námsbrautir innan Viðskiptafræðideildar stóðu fyrir viðburðinum, MS-námsbraut í verkefnastjórnun og MA-námsbraut í alþjóðaviðskiptum og verkefnastjórnun. Inga Minelgaite prófessor hefur umsjón með báðum námsleiðunum.

Ráðstefnan var með frumlegu sniði og var dagskráin tvískipt. Í fyrri hlutanum voru flutt stutt erindi og farið var yfir fjölbreytt efni í verkefnastjórnun. Eitt þekktasta nafnið á sviði verkefnastjórnunar á heimsvísu, dr. Reinhard Wagner, hélt aðalerindið en það bar yfirskriftina „Er verkefnastjórnun enn þörf á tímum gervigreindar?“ Aðrir fyrirlesarar, bæði innlendir og erlendir, fjölluðu um gervigreind sem verkefnateymi, PMO hjá Orku náttúrunnar, eldvirkni í Reykjanesbæ – sjónarhorn verkefnastjóra og hvernig á að láta verkefnastjórnunargráðuna virka. Inga Minelgaite prófessor, Aðalbjörn Þórólfsson, formaður Verkefnastjórnunarfélags Íslands, og Mladen Vukomanović, forseti IPMA, opnuðu ráðstefnuna.

Í seinni hluta ráðstefnunnar sóttu þátttakendur eina af fjórum vinnustofum með verkefnum eða umræðum. Niðurstöður úr öllum vinnustofunum voru kynntar í lokahluta ráðstefnunnar.

Nýlega hlaut MS-nám í verkefnastjórnun viðurkenningu frá IPMA, einum stærstu samtökum fagfólks í verkefnastjórnun í heiminum. Þá barst metfjöldi umsókna í námsleið í alþjóðaviðskiptum og verkefnastjórnun, sem hófst fyrir réttu ári, á þessu ári.

Viðburðurinn var skipulagður í samstarfi við Verkefnastjórnunarfélag Íslands og var haldinn með stuðningi sjóðs sem styður samfélagsvirkni starfsfólks skólans.

Myndir frá ráðstefnunni má finna hér að neðan.