Sverrir Sigurðsson, MS frá Viðskiptafræðideild
Uppáhaldssjónvarpsþátturinn þinn endar á óbærilega spennandi máta og næst á dagskrá er endursýning á franskri stuttmynd. Fáeinar flettingar í tölvunni og hægt er að horfa á næsta þátt. „Þeir dagar eru liðnir þar sem mögulegt var að bíða í nokkur ár með að sýna nýjustu þættina frá Bandaríkjunum og neytendur vilja sjá þá sem allra fyrst,“ segir Sverrir Sigurðsson, MS í viðskiptafræði, en hann skrifaði meistararitgerð um niðurhal Íslendinga á sjónvarpsþáttum. „Rannsóknin sýnir að sjónvarpsstöðvar hér á landi þurfa að mæta eftirspurn neytenda betur en þær gera nú. Einnig sýnir rannsóknin að það þarf að auðvelda fólki aðgang að sjónvarpsþáttunum og gera því kleift að horfa á þá þegar því hentar og þar sem því hentar,“ segir Sverrir.
Sverrir Sigurðsson
„Þeir dagar eru liðnir þar sem mögulegt var að bíða í nokkur ár með að sýna nýjustu þættina frá Bandaríkjunum og neytendur vilja sjá þá sem allra fyrst,“ segir Sverrir Sigurðsson, MS í viðskiptafræði, en hann skrifaði meistararitgerð um niðurhal Íslendinga á sjónvarpsþáttum.
Sverrir segist lengi hafa haft áhyggjur af því að ólöglegt niðurhal geti komið niður á framboði. „Hættan er sú að þættir sem eru dýrir í framleiðslu afli ekki nægra tekna til að standa undir sér. Ég vildi því skoða hvort Íslendingar væru tilbúnir til að kaupa seríurnar beint af framleiðendum,“ segir Sverrir.
„Það var mikill skortur á rannsóknum á niðurhali sjónvarpssería þar sem rannsóknir hingað til hafa að mestu snúist um ólöglegt niðurhal á tónlist og kvikmyndum. Ég gerði ráð fyrir því að umræðan um þetta myndi aukast og það reyndist rétt hjá mér því að þessi mál voru mikið í umræðunni nú í haust,“ segir Sverrir um ástæðu þess að hann hóf rannsóknir á niðurhali.
Helstu niðurstöður rannsóknarinnar voru þær að þátttakendur höfðu mikinn áhuga á að hala niður sjónvarpsþáttum frá Bandaríkjunum en voru ekki tilbúnir að greiða háar fjárhæðir fyrir slíkt niðurhal. Þetta er í samræmi við erlendar rannsóknir en rúmur helmingur þátttakenda sagðist hafa halað niður sjónvarpsþáttum ólöglega.
Sverrir segir niðurstöðurnar að mestu leyti hafa verið í samræmi við það sem hann átti von á. „Helst kom á óvart hve hátt hlutfall Íslendinga hafði halað niður sjónvarpsþáttum ólöglega. Einnig kom dálítið á óvart að þeir sem höluðu mest niður ólöglega reyndust vera tilbúnir til að borga mest fyrir sjónvarpsþáttaraðir ef þeir gætu keypt þær um leið og þær væru sýndar í Bandaríkjunum,“ segir Sverrir að lokum.
Leiðbeinandi: Friðrik Eysteinsson, fyrrverandi aðjunkt við Viðskiptafræðideild.