Doktorsfyrirlestur í spænsku: Hasan Karakilinc

Föstudaginn 21. mars 2025 fer fram doktorsfyrirlestur við Mála- og menningardeild við Háskóla Íslands. Þá heldur Hasan Karakilinc doktorsfyrirlestur sinn í spænsku. Viðburðurinn fer fram í Hátíðasal í Aðalbyggingu Háskóla Íslands og hefst kl. 14:00.

Hasan varði doktorsritgerðina sína þann 16. desember síðastliðinn við Háskólann í Toulouse Jean Jaurès í Frakklandi. Doktorsritgerðin ber heitið „Vettvangur fjölradda andspyrnu: Útópísk skörun innan pönksenunnar í Buenos Aires“ á íslensku og var unnin undir leiðsögn Hólmfríðar Garðarsdóttur, prófessors í spænsku við Háskóla Íslands, og Michèle Soriano, prófessor Í spænsku og bókmenntum rómönsku Ameríku við Háskólann í Toulouse Jean Jaurès. 

Þórhallur Eyþórsson, varadeildarforseti Mála- og menningardeildar, stjórnar athöfninni.

Um rannsóknina

Í rannsókninni er sjónum beint að mótun og þróun pönksenunnar í Argentínu allt frá upphafsárum hennar á áttunda áratug síðustu aldar. Til að nálgast verkefnið frá þverfaglegu sjónarhorni menningarfræða er horft til pólitískra aðstæðna og hugmyndafræðilegra áherslna þeirra sem mótuðu senuna. Andstaða við ríkjandi valdafyrirkomulag var ráðandi og til varð orðræða og tungutak sem skóp nýtt samhengi. Innan senunnar var útópískum og róttækum hugmyndum haldið á lofti. Uppbrot, spenna og skautun gerðu vart við sig og leikendur á sviði pönksins tóku þátt í stöðugri endurskoðun og endursköpun aðstæðna og aðferða. Þessar vendingar eru settar í öndvegi við greiningu hápólitískra pönktexta senunnar með það að leiðarljósi að tilgreina þá margvíslegu og áhrifamiklu krafta sem hún hefur alið af sér síðustu áratugi.

Um doktorinn

Hasan lauk BA-prófi í spænsku við Université de Bretagne Sud í Frakklandi og MA í Suður-Ameriku fræðum við Université de Toulouse II – Jean Jaurès.